Mĩthenya ĩkũmi ĩtina wa Yesũ kũsyoka ĩtunĩ, amanyĩwʼa make nĩmakwatie veva mũtheu. Nũndũ yĩu yaĩ ĩvinda ya Vendekosito ya mwaka wa 33, andũ aingĩ nĩmookĩte Yelusaleme kuma kũndũ kwĩ kĩvathũkanyʼo. Ĩvindanĩ o yĩu amanyĩwʼa ma Yesũ ta 120 nĩmombanie nyũmbanĩ ya ĩũlũ. Na ĩndĩ matataĩĩe, ũndũ wa kũsengyʼa weekĩka. Moonie syĩndũ iilye nĩmĩ sya mwaki syatheea mũtwenĩ wa kĩla ũmwe woo, na mambĩĩa kũneena ithyomo syĩ kĩvathũkanyʼo. Na ĩndĩ meewʼa wasya mũnene ũilyĩ ta wa kĩuutani.

Yĩla aeni ala mookĩte Yelusaleme maumĩte nthĩ syĩ kĩvathũkanyʼo meewie wasya ũsu, masembie mathi nyũmbanĩ ĩsu makone nĩ kyaũ kyaendeee. Mavika masengʼie mũno kwĩwʼa amanyĩwʼa maineena ithyomo isu syĩ kĩvathũkanyʼo. Kwoou masya atĩĩ: ‘Andũ aa maumĩte Kalilii. Nĩ kyaũ kĩũtuma maneena ithyomo ila tũneenaa?’

Nĩvo ĩndĩ Vetelo na atũmwa ala angĩ maũngamie mbee wa ĩkomano yĩu. Ĩtina wa ũu, Vetelo nĩwamaeleisye ũndũ Yesũ wooaiwe na ũndũ  Yeova waĩ anamũthayũũkisye. Ameie atĩĩ: ‘Yu Yesũ e ĩtunĩ ailye kwʼokonĩ kwa aũme kwa Ngai, na nĩwe watwĩtĩkĩsya veva mũtheu o ũndũ wathanĩte. Kĩu nĩkyo kĩtumi maũndũ aa manene meekĩka.’

Andũ asu meewie ndeto sya Vetelo syamakiita mũno, na kwoou mamũkũlya atĩĩ: “Twaĩle kwĩka ata?” Nake amea: ‘Ĩlilei naĩ syenyu na mũivatiswa ĩsyĩtwanĩ ya Yesũ. Na ĩndĩ mũkakwata mũthĩnzĩo wa veva mũtheu.’ Mũthenya ũsu, andũ ta 3,000 nĩmavatisiwe. Na ĩndĩ kuma ĩvindanĩ yĩu na kũendeea, amanyĩwʼa maendeea kwongeleka na mĩtũkĩ ndũanĩ ya Yelusaleme. Kwoou atũmwa maitetheewʼa nĩ veva mũtheu, nĩmambĩlĩĩilye ikundi mbingĩ nĩ kana mamanyĩsye amanyĩwʼa asu maũndũ onthe ala Yesũ wameaĩe.