Thikũ ikũmi thutha wa Jesu gũcoka igũrũ, arutwo ake nĩ maamũkĩrire roho mũtheru. Kwarĩ mwaka wa 33 thutha wa Kristo, na andũ aingĩ nĩ maathiĩte Jerusalemu moimĩte kũndũ gũtiganĩte nĩguo makũngũĩre Gĩathĩ gĩa Pentekoste. Arutwo ta 120 a Jesu nĩ maacemanĩtie nyũmba-inĩ ĩmwe ya ngoroba. O rĩmwe nĩ gwekĩkire ũndũ wa magegania. Nĩ kuonekire kĩndũ kĩahaanaga ta mwaki igũrũ rĩa mĩtwe ya arutwo othe na makĩambĩrĩria kwaria na thiomi itiganĩte. Nyũmba ĩyo nĩ yaiyũrire mũgambo watariĩ ta wa rũhuho rũnene.

Ageni arĩa maathiĩte Jerusalemu moimĩte kũndũ kũngĩ nĩ maaiguire mũgambo ũcio na magĩteng’era kũrora nĩ kĩĩ gĩathiaga na mbere. Nĩ maamakire mũno rĩrĩa maaiguire arutwo makĩaria na thiomi icio. Moigire ũũ: ‘Githĩ andũ aya ti a Galili? Marahota atĩa kwaria na thiomi citũ?’

Petero na atũmwo acio angĩ nĩ maarũgamire mbere ya kĩrĩndĩ kĩu. Petero nĩ aamerire ũrĩa Jesu oragirũo na atĩ Jehova  nĩ aamũriũkĩtie. Aacokire akĩmeera ũũ: ‘Rĩu Jesu arĩ igũrũ guoko-inĩ kwa ũrĩo kwa Ngai, na nĩ atũitĩrĩirie roho mũtheru o ta ũrĩa kweranĩirũo. Nĩkĩo mũrona ciama ici na mũgaciigua.’

Ciugo icio cia Petero nĩ ciahutirie andũ acio ngoro mũno na makĩmũũria: “Twagĩrĩirũo gwĩka atĩa?” Aameerire ũũ: ‘Mwĩrirei mehia manyu na mũbatithio thĩinĩ wa rĩĩtwa rĩa Jesu. Ningĩ nĩ mũkwamũkĩra kĩheo kĩa roho mũtheru.’ Mũthenya ũcio andũ ta 3,000 nĩ maabatithirio. Kuuma hĩndĩ ĩyo, arutwo nĩ maambĩrĩirie kuongerereka na ihenya mũno thĩinĩ wa Jerusalemu. Magĩteithĩrĩrio nĩ roho mũtheru, atũmwo nĩ maambĩrĩirie ciũngano ingĩ nyingĩ nĩguo mahote kũruta arũmĩrĩri a Jesu maũndũ marĩa mothe aamaathĩte.