Omafiku omulongo konima eshi Jesus a shuna meulu, ovahongwa vaye ova li va pewa omhepo iyapuki. Ovanhu ova li ve uya kuJerusalem va dja keenhele dihapu opo ve uye va dane oshivilo shOpentekoste 33 O.P. Ovahongwa vaJesus 120 lwaapo ova li va ongala monduda yopombada. Ombadilila, opa li pa ningwa oshinima shikumwifi. Opa li pa holoka oinima ya fa omalaka omundilo kombada yomitwe dovahongwa, ndele aveshe tava hovele okupopya omalaka e lili noku lili. Opa li pa udika engungumo linene.

Ovatalelipo va dja koilongo imwe ovo va li ve uya muJerusalem ova li va uda engungumo olo ndele tava i keumbo oko va ka tale osho sha ningwa po. Ova li va kumwa eshi va uda ovahongwa tava popi omalaka oo. Ova ti: ‘Ovanhu ava ova dja kuGalilea. Osha enda ngahelipi va kale tava dulu okupopya omalaka etu?’

Opo nee Petrus novayapostoli vakwao ova li va fikama komesho yongudu. Petrus okwe va lombwela nghee Jesus a dipawa nonokutya Jehova okwe mu nyumuna koufi. Petrus okwa ti: ‘Paife Jesus oku li meulu kolulyo laKalunga,  nokwe va tilila omhepo iyapuki oyo a li e va udanekela. Nomolwaasho mwa mona nomwa uda oikumwifilonga ei.’

Ovanhu ova li ve linyengifwa neenghono keendjovo daPetrus, ndele tava pula tava ti: ‘Otu na okuninga shike?’ Okwe va lombwela a ti: ‘Lidilululeni omatimba eni ndele tamu ninginifwa medina laJesus. Nanye otamu ka pewa oshali yomhepo iyapuki.’ Mefiku olo, opa li pa ninginifwa ovanhu 3 000 lwaapo. Okudja opo, ovahongwa ova li va hovela okuhapupala diva muJerusalem. Kekwafo lomhepo iyapuki, ovayapostoli ova li va tota po omaongalo mahapu opo va dule okuhonga ovahongwa oinima aishe oyo Jesus e va lombwela.