Исаның көкке көтерілгеніне он күн болғанда, шәкірттерге киелі рух қонды. Бұл б. з. 33 жылының Елуінші күн мейрамы болатын. Соған орай Иерусалимге түрлі-түрлі жерлерден көп адам келген еді. Исаның 120-дай шәкірті бір үйдің жоғарғы бөлмесінде жиналып отырғанда, таңғаларлық бір жағдай болды. Әр шәкірттің басында отқа ұқсайтын бір нәрсе пайда болды. Содан кейін олар әртүрлі тілдерде сөйлей бастады. Кенеттен қатты жел соққандай дауыс шығып, үйдің іші жаңғырып кетті.

Басқа қалалардан келген адамдар қатты шуды естігенде, не болып жатқанын білу үшін сол үйге қарай асықты. Шәкірттердің басқа тілдерде сөйлеп жатқанын көріп, олар қатты таңғалды. Бір-біріне: “Бұл адамдар Ғалилеядан ғой. Қалайша олар біздің тілімізде сөйлеп жатыр?”— деді.

Сонда Петір мен басқа елшілер халықтың алдына шықты. Петір оларға Исаның өлгенін және Ехобаның оны қайта тірілткенін айтып  берді. Сосын ол былай деді: “Қазір Иса Құдайдың оң жағында отыр. Ол уәде еткен киелі рухты бізге төкті. Өздеріңіз көріп, естіп тұрған бұл кереметтер соның арқасында болды”.

Петірдің сөздері адамдарға қатты әсер еткені сонша: “Енді біз не істеуіміз керек?”— деп сұрай бастады. Петір оларға былай деді: “Күнәларыңызға өкініп, Исаның атынан шомылдыру рәсімінен өтіңіздер. Сонда сіздер де сый ретінде киелі рухты аласыздар”. Сол күні шамамен 3000 адам шомылдыру рәсімінен өтті. Осы жағдайдан кейін Иерусалимдегі шәкірттердің саны көбейе түсті. Киелі рухтың көмегімен елшілер көптеген қауымдар құрды. Сөйтіп, елшілер Иса үйрет деп бұйырғандардың бәрін шәкірттерге үйрете алды.