Batumwa batambwile mupashi wazhila wibalayile Yesu byo papichiletu moba jikumi kufuma po ayijile mwiulu. Pajinga pa juba ja kijiilo kya Pentekosita wa mu 33 C.E., bantu bavula saka baiya mu Yelusalema kufuma mu mapunzha avula. Mu kibamba kya peulu mwajinga baana ba bwanga 120. Nobe mu kukopatu kwa jiso, bamwene kya kukumya. Bintu byamwekelenga nobe mujilo byajinga pa mitwe ya baana ba bwanga bonse. Kabiji bonse batendekele kwamba milaka yapusana pusana. Kepo kilulumo kikatampe kyaumvwanyikile mu nzubo mo bajinga.

Bantu bonse baishile mu Yelusalema kufuma mu byalo, byo baumvwine kino kilulumo banyemejileko lubilo ku ino nzubo kuba’mba bamone kyamweka. Bakuminye bingi pa kumvwa batumwa saka babena kwamba mu milaka yapusana pusana. Baipwizhenga’mba: “Nanchi bano bonse babena kwamba, kechi bena Ngalilea nenyi? Pano tubena kumvwa byepi atweba bonse awu mu mulaka wanji, awu mu mulaka wanji?”

 Petelo waimene kulutwe ya jibumba na batumwa bakwabo. Walumbulwijile bulongo bantu Yesu byo bamwipayile ne byo amusangwile kwi Yehoba. Petelo waambile’mba: ‘Yesu uji mwiulu ku kuboko kwa kilujo kya Lesa ye waitulula mupashi wazhila ye alaile. O ene mambo o mubena kumvwina ne kumona bino bya kukumya.’

Byambo byaambile Petelo byafikile bantu pa muchima. Baipwizhe’mba: “Nanchi tube byepi?” Petelo wibakumbwile’mba: “Lapilai ne kubatizhiwa mu jizhina ja Yesu Kilishitu, kabiji musakutambula mupashi wazhila wa bupetu.” Pa jonkaja juba, bantu nobe 3,000 babatizhiwe. Kufumatu pa joja juba, baana ba bwanga bavujilengako bingi mu Yelusalema. Mupashi wazhila wakwashishe batumwa kulenga bipwilo byavula pa kuba’mba bafunjishenga baana ba bwanga byonse bibakambizhe Yesu.