Tɛn dez afta we Jizɔs go bak na ɛvin, in disaypul dɛn bin gɛt oli spirit. Di de fɔ Pɛntikɔst insay di ia 33, bɔku pipul dɛn kam na Jerusɛlɛm frɔm difrɛn say dɛn fɔ kam sɛlibret di Pasova. Na lɛk 120 disaypul dɛn bin gɛda na di rum we bin de ɔp wan os. I nɔ tu te, wan wɔndaful tin bin apin. Sɔntin we fiba lɛk faya bin de pantap ɔl di disaypul dɛn ed dɛn, ɛn dɛn bigin fɔ tɔk difrɛn difrɛn langwej dɛn. Wan lawd sawnd we fiba lɛk big big briz bin ful-ɔp di rum.

Strenja dɛn we kɔmɔt difrɛn say dɛn we kam na Jerusɛlɛm bin yɛri di sawnd ɛn rɔn go na di os fɔ si wetin bin de apin. Dɛn bin kɔle we dɛn yɛri di disaypul dɛn de tɔk difrɛn difrɛn langwej dɛn. Dɛn tɔk se: ‘Bɔt dɛn pipul dɛn ya kɔmɔt Galili. Aw dɛn ebul tɔk difrɛn difrɛn langwej dɛn?’

Dɔn Pita ɛn di ɔda apɔsul dɛn kam bifo di krawd. Pita tɛl di pipul dɛn aw dɛn kil Jizɔs ɛn aw Jiova gi am layf bak. Pita tɔk se:  ‘Naw Jizɔs de na ɛvin na Gɔd in raytan, ɛn Jiova dɔn put pan am in oli spirit we i bin dɔn prɔmis. Na dat mek una de si ɛn yɛri bɔt dɛn mirekul dɛn ya.’

Di wɔd dɛn we Pita tɔk bin rili tɔch dɛn at, ɛn dɛn tɔk se: “Wetin wi fɔ du?” I tɛl dɛn se: ‘Una ripɛnt frɔm una sin dɛn ɛn baptayz insay Jizɔs in nem. Una go gɛt oli spirit we na di gift we Gɔd de gi.’ Da de de, na lɛk 3,000 pipul dɛn bin baptayz. Frɔm da tem de, di disaypul dɛn bigin bɔku na Jerusɛlɛm kwik kwik wan. Di oli spirit bin ɛp di apɔsul dɛn fɔ mek mɔ kɔngrigeshɔn dɛn, so dat dɛn go tich di disaypul dɛn ɔl di tin dɛn we Jizɔs dɔn tɛl dɛn fɔ du.