တၢ်မၤလိ ၉၄
ယ့ၣ်ၡူးအပျဲၢ်အဘီၣ်တဖၣ် ဒိးန့ၢ်ဘၣ်သးစီဆှံ
ဖဲ ခ.န. ၃၃ ဘူၣ်ယဲၢ်ဆံအနံၤန့ၣ် ပှၤအိၣ်လၢတၢ်လီၢ်အါတီၤ ဟဲဝဲလၢဝ့ၢ်ယရူၤၡလ့ၣ်အပူၤ ဒ်သိး ကမၤဝဲဘူၣ်အံၤအဂီၢ်လီၤ. ယ့ၣ်ၡူးအပျဲၢ်အဘီၣ်အဂၤ ၁၂၀ ဃၣ်ဃၣ် ပာ်ဖှိၣ်ထီၣ်အသးလၢ ဒၢးတဖျၢၣ်လၢဟံၣ်ဖီခိၣ် ဒီးဖဲန့ၣ်အဆၢကတီၢ် ယ့ၣ်ၡူးအပျဲၢ်အဘီၣ်တဖၣ် ဒိးန့ၢ်ဘၣ်ဝဲသးစီဆှံန့ၣ်လီၤ. ဝံၤဒီး တၢ်လီၤလးဟဲကဲထီၣ်အသးတခါလီၤ. တၢ်လၢအလီၤဂာ်ဒ်မ့ၣ်အူလၣ် အိၣ်ဖျါထီၣ်လၢ ယ့ၣ်ၡူးအပျဲၢ်အဘီၣ် တဂၤစုာ်စုာ်အခိၣ်လိၤလီၤ. ဒီးအဝဲသ့ၣ်ခဲလၢာ် စးထီၣ်တဲဝဲ ကျိာ်လၢအဂၤလီၤ. တၢ်သီၣ်လီၤဝဲ သတူၢ်ကလာ်လၢမူခိၣ်, ပှဲၤဟံၣ်ပူၤ ဒ်ကလံၤမုၢ်ဟဲသီၣ်ဝဲအသိးလီၤ. တၢ်မၤအသးတဖၣ်အံၤ ကဲထီၣ်အသးဖဲ ယ့ၣ်ၡူးက့ၤထီၣ်ဆူမူခိၣ် အသီတဆံဝံၤအလီၢ်ခံန့ၣ်လီၤ.
ပှၤတမှံၤလၢထံကီၢ်အဂၤတဖၣ်န့ၣ် ဟဲဝဲလၢယရူၤၡလ့ၣ်လီၤ. ဖဲအဝဲသ့ၣ်နၢ်ဟူတၢ်ကလုၢ်သီၣ်အခါ အဝဲသ့ၣ်လဲၤဃ့ၢ်ဆူ ဟံၣ်တဖျၢၣ်န့ၣ် ဒ်သိးကထံၣ်ဝဲတၢ်မနုၤမၤအသးလဲၣ်န့ၣ်လီၤ. ဖဲအဝဲသ့ၣ် နၢ်ဟူယ့ၣ်ၡူးအပျဲၢ်အဘီၣ်တဖၣ် ကတိၤတၢ်လၢအဝဲသ့ၣ်အကျိာ်အခါ အဝဲသ့ၣ်ကမၢကမၣ်ဝဲဒိၣ်မးလီၤ. အဝဲသ့ၣ်တဲဝဲလၢ– ‘ပှၤသ့ၣ်တဖၣ်အံၤ အိၣ်ဟဲလၢကၤလံၤလါ, ဘၣ်ဆၣ် အဝဲသ့ၣ်တဲပကျိာ်သ့ဒ်လဲၣ်.’
ဝံၤဒီးစီၤပ့းတရူးဒီး တၢ်မၢဖိအဂၤတဖၣ် ဂဲၤဆၢထၢၣ်လၢကမျၢၢ်အမဲာ်ညါလီၤ. စီၤပ့းတရူး တဲနၢ်ပၢၢ်အဝဲသ့ၣ်လၢ ယ့ၣ်ၡူးန့ၣ်ဘၣ်တၢ်မၤသံအီၤဒ်လဲၣ် ဒီးယဟိဝၤယွၤ မၤသမူထီၣ်က့ၤအီၤ
ဒ်လဲၣ်အဂ့ၢ်န့ၣ်လီၤ. ဒီးစီၤပ့းတရူးတဲဘၣ် အဝဲသ့ၣ်လၢ– ‘ခဲအံၤ ယ့ၣ်ၡူးအိၣ်လၢမူခိၣ်, ဆ့ၣ်နီၤဝဲလၢအပၢ်အစုထွဲ ဒီးဟ့ၣ်လီၤပှၤသးစီဆှံ ဒ်အအၢၣ်လီၤပာ်ဝဲအသိးလီၤ. လၢတၢ်န့ၣ်အဃိ သုထံၣ်ဒီးနၢ်ဟူဘၣ် တၢ်လီၤလးတဖၣ်အံၤလီၤ.’စီၤပ့းတရူးအတၢ်ကတိၤအံၤ ထုးန့ၢ်ပှၤဂီၢ်မုၢ်အသးဒိၣ်မးလီၤ. အဝဲသ့ၣ်သံကွၢ် စီၤပ့းတရူးလၢ– “ပကမၤဒ်လဲၣ်.” စီၤပ့းတရူး တဲဘၣ်အဝဲသ့ၣ်လၢ– ‘ပီၢ်ယၢ်လီၤက့ၤသုသး ဒီးဒိးဘျၢသုသးလၢ ယ့ၣ်ၡူးအမံၤတက့ၢ်. ဒီးသုကဒိးန့ၢ်ဘၣ် တၢ်ဟ့ၣ်လၢအမ့ၢ်သးစီဆှံလီၤ.’ ဖဲနံၤအဝဲန့ၣ် ပှၤအဂၤ ၃,၀၀၀ ဃၣ်ဃၣ် ဒိးဘျၢအသးလၢထံလီၤ. စးထီၣ်ဖဲန့ၣ်ဝံၤအလီၢ်ခံ ယ့ၣ်ၡူးအပျဲၢ်အဘီၣ်တဖၣ်လၢ ဝ့ၢ်ယရူၤၡလ့ၣ်အပူၤန့ၣ် အနီၣ်ဂံၢ်အါထီၣ်ဝဲ ချ့ဒိၣ်မးလီၤ. ခီဖျိလၢ သးစီဆှံအတၢ်မၤစၢၤအဃိ တၢ်မၢဖိတဖၣ်သူၣ်ထီၣ်ဝဲ တၢ်အိၣ်ဖှိၣ်တဖၣ်လီၤ. ဒီးတၢ်မၢဖိတဖၣ်သိၣ်လိ ယ့ၣ်ၡူးအပျဲၢ်အဘီၣ်တဖၣ် ကယဲၢ်တၢ်လၢယ့ၣ်ၡူး မၤလိာ်တ့ၢ်အဝဲသ့ၣ်န့ၣ်လီၤ.
“နမ့ၢ်အၢၣ်လီၤအီလီၤ ကစၢ်ယ့ၣ်ၡူးလၢ နထးခိၣ်, ဒီးနာ်လၢနသးလၢ ယွၤဒုးဂဲၤဆၢထၢၣ်က့ၤအီၤလၢ တၢ်သံန့ၣ်ဒီး, နကတုၤလၢတၢ်အုၣ်က့ၤခီၣ်က့ၤနၤလီၤ.”—ရိမ့ၤ ၁၀:၉