Apa ga pitire po mazuva 10 konyima zapa Jesus ga tengwire meguru, varongwa vendi kwa gwene mpepo zokupongoka. Alyo kwa kere ezuva lyoPentekoste momvhura 33, ano vantu wokonomukunda dokulisiga-siga kwa wizire moJerusarema va ya dane Paska. Varongwa vaJesus wokusika 120 kwa pongere konzugo zekeguru. Hararasi, tapa horoka sininke sokutetukisa. Yininke yokufana ngwendi maraka gomundiro kwa temberere pomutwe gwankenye murongwa, tava tameke kuuyunga maraka peke-peke. Sipupiro sosinene ngwendi sompepo tasi zwida nzugo mudima.

Vagenda wokonomukunda dokulisiga-siga ava va wizire koJerusarema va zuvhire sindundumo oso, makura tava duka va ze konzugo va ka tare eyi ya horokere. Navenye kwa tetukire apa va zuvhire varongwa kuna kuuyunga maraka peke-peke. Tava tanta asi: ‘Vantu ava kwa tunda koGalireya. Omu vana kuuyunga eraka lyetu ngapi?’

Peturusa novapositoli vakwawo tava sikama komeho zombunga.  Peturusa ta tantere vantu omu Jesus va mu dipagere nomu Jehova ga mu pindura koufe. Peturusa ta tanta asi: ‘Jesus mweli meguru korulyo rwaKarunga, yiyo ana powomona mpepo zokupongoka moomu ga yi tumbwidira. Eyi yiyo muna kumonena yitetu eyi nokuyizuvha.’

Vantu kwa va gumine nonkango daPeturusa, makura tava pura asi: “Ngapi omu natu rugana?” Ta va tantere asi: ‘Litezurureni kononzo deni, va mu kuhwire medina lyaJesus. Yipo ngomu tambure uhwi wompepo zokupongoka.’ Ezuva olyo, vantu wokusika 3 000 kwa gwene ekuho. Kutunda opo, varongwa tava ligwederere moJerusarema. Nevatero lyompepo zokupongoka, vapositoli tava tulisa po nombungakriste yipo va ronge varongwa nayinye eyi ga va pangerere Jesus.