Vava vavioka lumbu kumi tuka Yesu kavutukila kuna zulu, alongoki andi batambula mwand’avelela. Batambula mwanda wau muna lumbu kia Pentikosti ya mvu wa 33 wa Tandu Kieto. Wantu batuka mu fulu yayingi bayiza ku nkinzi wakala muna Yerusaleme. Tezo kia 120 ma alongoki a Yesu bakutakana muna suku dia ntandu dia nzo mosi. Vana vau, diambu diasivi diavangama. Lekwa kimosi kiakala nze nlaku a tiya kiatensama vana ntandu a ntu wa konso nlongoki, yau awonso bayantika vova ndinga zaswaswana. Zú diakala nze tembwa kiangolo diazala muna nzo.

Vava anzenza ana bayiza muna Yerusaleme bawá e zú diadi, bayenda mu nzaki kuna nzo yayina mu zaya dina diavangamanga. Basivika kikilu vava bawá alongoki bavovanga e ndinga za kinzenza. Bavova vo: ‘Wantu awaya esi Ngalili. Aweyi bevovelanga e ndinga zeto?’

I bosi, Petelo ye ntumwa zankaka batelama vana ntwal’a nkangu. Petelo wazayisa kwa nkangu una Yesu kavondelwa ye  una Yave kamfutumwina muna mafwa. Petelo wavova vo: ‘Owau, Yesu kuna zulu kena kuna koko kwalunene kwa Nzambi, obungwidi mwand’avelela una kasia o nsilu. Kiaki i kuma numuenene yo wá masivi mama.’

E mvovo mia Petelo miasimba kikilu ntima mia wantu. Bayuvula vo: “Adieyi tufwete vanga?” Petelo wabavovesa vo: ‘Nuviluka e ntima yo vubilwa muna nkumbu a Yesu Kristu. Oyeno mpe nutambula lukau lwangovo lwa mwand’avelela. Muna lumbu kiakina, tezo kia 3.000 ma wantu bavubwa. Tuka wauna, lutangu lwa alongoki muna Yerusaleme lwayantika wokela mu nzaki. Muna lusadisu lwa mwand’avelela, antumwa basikidisa nkutakani zayingi kimana balonga alongoki mambu mawonso mana Yesu kabakanikina.