Hamulaho wa mazazi alishumi kuzwa fakutela Jesu kwa lihalimu, balutiwa bahae baamuhela moya okenile. Neli ka Pentekota ya 33 C.E., mi batu bane bazwa mwa libaka zeñata-ñata bataha kuto eza mukiti mwa Jerusalema. Nekunani balutiwa ba Jesu bababato eza 120 bane bakopani mwa muzuzu wa kwahalimu wa ndu. Honafo feela, kwaezahala nto yeñwi yekomokisa. Nto yeñwi yeneswana sina lulimi lwa mulilo yakala kubonahala fahalimwaa toho ya mulutiwa ni mulutiwa, mi kaufelaa bona bakala kubulela lipuo zeshutana-shutana. Kwautwahala mulumo omutuna oswana sina liñungwa mi watala mwa ndu mone bainzi.

Baenyi bane bazwa mwa libaka zeñwi ili bane batile kwa Jerusalema bautwa mulumo wo mi bamatela kwandu yeo kuli bayo bona zeneezahala. Nebakomokile hahulu hane bautwile balutiwa ababulela lipuo zeo. Kihaa bali: ‘Kono batu ba bazwa kwa Galilea. Bakona cwañi kubulela lipuo zaluna?’

 Cwale Pitrosi ni baapositola babañwi bayema fapilaa sicaba. Pitrosi ataluseza batu mwanaabulaezwi Jesu ni mo Jehova naamuzuselize kwa bafu. Pitrosi ali: ‘Ka nako ya cwale, Jesu u kwa lihalimu kwa lizoho la bulyo la Mulimu, mi ulusululezi moya okenile sina mwanaasepiselize. Ki lona libaka hamuboni ni kuutwa limakazo ze.’

Batu nebasusuelizwe hahulu ki manzwi a Pitrosi, mi babuza kuli: “Luswanela kuezañi?” Kihaa li ku bona: ‘Mubakele libi zamina mi mukolobezwe ka libizo la Jesu. Mi hape mukaamuhela mpo ya moya okenile.’ Ka lona lizazi leo, batu babato eza 3,000 bakolobezwa. Kuzwa feela honafo, palo ya balutiwa mwa Jerusalema yakala kuekezeha kapili-pili. Ka kutusiwa ki moya okenile, baapositola batoma liputeho zeñata ilikuli bakone kuluta balutiwa lika kaufela zanaa balaezi Jesu.