Bayidi ba Yezu bakapeta nyuma muimpe matuku dikumi yeye mumane kupingana mu diulu. Bivua mu Pentekoste wa mu 33 panyima pa Yezu, pavua bantu balue mu Yelushalema bafumina miaba ya bungi bua kubuela mu tshibilu atshi. Kuvua bayidi ba Yezu batue ku 120 bavua badisangishe mu tshibambalu tshia kuulu tshia nzubu kampanda. Diakamue bualu bua dikema buakenzeka. Tshintu tshienze bu ludimi lua kapia tshiakimana pa mutu pa muyidi yonso, ne bakatuadija kuakula miakulu mishilashilangane. Mutoyi bu wa tshipepele tshikole wakuwula mu nzubu.

Bantu bavua balue mu Yelushalema bafumina mu maloba makuabu bakumvua mutoyi au, kuyabu lubilu mu nzubu au bua kumona tshivua tshienzeka. Bakakema bikole pakumvuabu bayidi bakula miakulu ayi. Bakamba ne: ‘Bantu aba si mba mu Galela. Kadi mmunyi mudibu bafika ku diakula miakulu yetu?’

Ke Petelo ne bapostolo bakuabu kuimana kumpala kua bantu abu. Petelo wakambila bantu muvuabu bashipe Yezu, kabidi ne muvua Yehowa mumubishe ku lufu. Petelo wakamba ne: ‘Mpindieu Yezu udi  mu diulu ku tshianza tshia balume tshia Nzambi, ne mmuitshikijile bayidi nyuma muimpe uvuaye mubalaye. Ke bualu kayi nudi bumvue ne bamone bishima ebi.’

Mêyi a Petelo akalenga bantu bikole, kuebejabu ne: “Tuenze tshinyi?” Yeye kubambila ne: ‘Nyingalalayi bua mpekatu yenu ne nubatijibue mu dîna dia Yezu. Nenupete penu dipa dia nyuma muimpe.’ Dituku adi, bantu batue ku 3000 bakabatijibua. Katshia anu pine apu, bayidi bakatuadija kuvula bikole mu Yelushalema. Ku diambuluisha dia nyuma muimpe, bapostolo bakenza bisumbu bia bungi bua kumona mua kulongesha bayidi malu onso avua Yezu mubambile.