Chimwahitili mafuku 10 kufuma hafuntiliyi Yesu mwiwulu, atumbanji twindi atambwilili spiritu yajila. Hadiña haPentekosta mu 33 C.E., nawa antu enjili kuchawija kuYerusalema kufuma kumaluña ashiyashana. Adiña atumbanji twaYesu kwakwihi na 120 apompeleli mukapeka kahewulu kamwitala. Hohenohu kwamwekeni chuma chakuhayamisha. Chuma chamwekeneña neyi muzuzu wakesi chenjili hamutu wakambanji wejima nawa wejima wawu atachikili kuhosha madimi ashiyashana. Lushindu lwadiña neyi mpepela yeneni lwatiyakeni mwitala mwejima.

Antu enjili kuYerusalema kufuma kumaluña amakwawu atiyili ilu lushindu nawa ayili lufuchi kwitala nakutala yuma yamwekeneña. Ahayamini chatiyiliwu atumbanji anakuhosha awa madimi. Ahosheli nawu: ‘Awa antu akuÑaliliya. Hanu dinu anakutwesha ñahi kuhosha mumadimi etu?’

Kuhiñahu Petulu niakwawu apostolu emeni kumbidi yezaza dawantu. Petulu walejeli antu chamujahiliwu Yesu nawa nindi Yehova wamusañwili  mudi afu. Wahosheli nindi: ‘Ichi Yesu wudi mwiwulu kuchikasa chaNzambi chachidiilu, nawa nahuñununi spiritu yajila yashiikiliyi. Dichinaleteshi mumoni nikutiya iyi yihayamisha.’

Mazu ahosheliyi Petulu ayishikili antu hamuchima, nawa ehwili nawu: “Twili ñahi?” Wayilejeli nindi: ‘Balumukenu munyichima nakuleka nshidi jenu nawa ayipapatishi mwijina daYesu. Ninenu mukutambwila chawaana chaspiritu yajila.’ Hanodu ifuku, antu kwakwihi na 3,000 apapatisheweli. Kufuma hohenohu, atumbanji atachikili kuvula swayi-swayi muYerusalema. Nawukwashu waspiritu yajila, apostolu atuñili yipompelu yayivulu kulonda adizisheña atumbanji yuma yejima yayilejeliwu kudi Yesu.