Ja nety të nyaxy mäjk xëëw mä Jesus pyatëjkë tsäjpotm. Ko ja yˈëxpëjkpëty tyukkëdakëdë espiritë santë. Tyäˈädë ja duˈun tyuun jyäjtë mä Pentekostes xëëw, mä jëmëjt 33, ko netyë jäˈäy nimay të jyäˈttë jam Jerusalén parë xyëwdunäˈändë. Japë netyë Jesusë yˈëxpëjkpëty të tyuˈukmuktë 120 mä tuˈugë tëjkë tuknikëˈëybyë, ko ajotkumonë ti tyuun jyäjtë. Duˈun kyëxëˈky extëmë jënˈyaˈank mä niduˈuk niduˈuk ja kyëbäjkëty ets ta tyëjkëdë käjpxpë kanäk ayuk. Nan yajmëdoow extëm tuˈugë mëk poj nyaxy diˈib yajtukpëmiˈimë ja tëjk.

Ja jäˈäyëty diˈibë nety të jyäˈttë jam Jerusalén, myëdoowdë wiˈix tyukpëmiˈimë ja tëjk ets ta ojts nyëjkxtë parë tˈixäˈändë ti tuun jäjtëp. Mëjˈixy mëjmëdoy tjäˈäwëdë ko ja Jesusë yˈëxpëjkpëty myaytyaktë kanäk ayuk. Ta jyënandë: “Tyäˈädë jäˈäyëty jam tsyoondë Galilea, ¿ets wiˈixën ko myaytyäˈäktë mä nˈayukˈäjtëm?”.

Ta ja Pedro etsë wiinkpë apostëlëty tyënääyëˈktë mayjyaˈay wyinduuy. Pedro jyënany: “Miitsëty mˈyaˈoˈktë Jesus, perë Jyobaa yëˈë  yajjukypyëjkë. Jesus tam tyam yajpääty tsäjpotm mä yˈaˈoytsyoowë Dios. Ets yëˈëts të xymyoˈoytyë espiritë santë diˈibëts xytyukwandaktë. Päätyën të xyˈixtë ets të xymyëdowdë tyäˈädë miläägrë”.

Ja jäˈäyëty mëjˈixy mëjmëdoy tjäˈäwëdë. Ja yˈääw yˈayukë Pedro jotjäjtëdë, pääty dyajtëëwdë: “¿Tits mbäät ndundë?”. Pedro ta yˈatsoowëdë: “Jodëmbittë mä ja mboky mgaytyeyëty ets nnëbattë xyëëwgyëjxmë Jesus. Ta nanduˈun xyˈaxäjëdët ja espiritë santë”. Mä tadë xëëw, ja nyëbajttë naa nidëgëëk milë jäˈäy. Ets desde jaa, niˈigyë nyimayëˈadëtstë ja Jesusë yˈëxpëjkpëty jam Jerusalén. Ja apostëlëty kanääk ja tuˈukmujkën dyajnaxkëdaktë mët ko yëˈë pudëjkëdë Diosë myëjääw. Duˈun ojts tyukniˈˈixëdë tukëˈëyë diˈibë netyë Jesus të tyukˈanaˈamëdë.