Dis zour apre ki Zezi ti retourn dan lesiel, so bann disip ti gagn lespri sin. Sa zour-la ti Lapantkot lane 33 Nou Lepok. Boukou dimounn ti sorti dan diferan pei pou vinn selebre sa fet-la dan Zerizalem. Apepre 120 disip Zezi ti rasanble dan enn pies lor letaz enn lakaz. Enn sel kout, enn kitsoz extraordiner ti arive! Enn kitsoz parey kouma enn laflam dife ti aparet lor latet sak disip, ek zot tou ti koumans koz diferan langaz. Enn gro tapaz, kouma tapaz enn divan bien for, ti ranpli lakaz-la.

Bann dimounn ki ti sorti depi lezot pei pou vinn Zerizalem, ti tann sa tapaz-la ek zot ti al gete ki ti arive. Zot ti etone kan zot ti tann bann disip koz diferan langaz. Zot ti dir: ‘Me sa bann dimounn-la sorti Galile. Kouma zot kapav koz nou langaz?’

Lerla, Pier ek bann lezot zapot ti vinn devan lafoul. Pier ti explik zot kouma Zezi ti mor ek osi ki Zeova ti resisit li. Pier ti  dir: ‘Asterla, Zezi dan lesiel, dan kote drwat Bondie, ek li’nn donn nou lespri sin, parey kouma li ti promet. Se pou sa rezon-la ki zot pe trouve ek tann sa bann mirak-la.’

Bann parol Pier ti tous leker bann dimounn, ek zot ti demann li: “Ki nou bizin fer?” Pier ti reponn zot: ‘Repanti ek pran batem o-nom Zezi. Zot osi, zot pou gagn lespri sin.’ Sa zour-la, apepre 3,000 dimounn ti batize. Depi sa zour-la, kantite disip Zezi dan Zerizalem ti koumans ogmante bien vit. Gras-a lespri sin, bann zapot ti form pli boukou kongregasion pou ki zot kapav ansegn bann disip tou bann kitsoz ki Zezi ti komann zot.