Pa cisila ca manda 10 kufuma pano Yesu waswililile ukwi yulu asambi yakwe yapokelile umupasi wa muzilo. Pali apa Pentekositi mu 33 C.E., nupya antu ukufuma umu ncende izipusanepusane yaile uku Yelusalemu mu kuzevya. Kwali asambi yakwe Yesu 120 akongine mu muputule wa papela. Lyene umu kupumikizya, kwacitiike icintu cimwi ica kuzungusya. Icintu cimwi icali wa cimbilimbili cikaziile pa mutwe wakwe cila musambi nupya yonsi yatandike ukulandila umu ndimi zipusanepusane. Mu ng’anda muvwisile icongo icali wa cimuza icikalamba.

Lino antu aile uku Yelusalemu kufuma uku ncende izipusanepusane yuvwile icongo yaile uku ng’anda pakuti yakalole ivyacitikanga. Yazungwike lino yuvwile asambi yakulandila umu ndimi izipusanepusane. Yalanzile iyati: ‘Antu yaa yafumile uku Galili. Nomba, u mulandu ci uno yakulandila indimi zitu?’

Lyene Petulo na auze imilile pa nkoleelo iumba. Petulo wanenyile antu vino Yesu wakomilwe nu kuti Yeova wa mutuutulwile. Petulo  walanzile nu kuti: ‘Lyene Yesu ali ukwi yulu kwi kasa li lunji lyakwe Leza nupya watatutumila umupasi uno watulavile. Ali mulandu kwene uno mwalolela nu kuvwa ivizungusyo vii.’

Mazwi yano Petulo walanzile yafisile antu pa mwenzo nupya yuzizye iyati: “I vyani fwandi vino tulinzile ukucita?” Wayanenyile ati: ‘Lapilini nu kubatiziwa umwi zina lyakwe Yesu. Nupya namwe kwene mulapokelela umupasi wa muzilo.’ Uwanda kwene uwa antu mupiipi na 3,000 yabatiziwe. Kufuma lilikwene asambi yatwalilile ukuvulilako zuwa sana umu Yelusalemu. Umupasi wa muzilo walenzile atumwa ukupanga ivilongano ivingi pakuti yasambilizye asambi vyonsi vino Yesu wayanenyile.