A Zeezi sẽn loog saasẽ wã, rasem piig poore, a karen-biisã paama vʋʋsem sõngã. Yaa yʋʋmd 33 Pãntekotã sasa. Neb wʋsg ra yii tẽns toor-toor n wa Zerizalɛm, kibsã yĩnga. A Zeezi karen-biis sẽn ta bãmb 120 n da tigim taab yĩngr doog pʋgẽ. La yel-solemd n maane. Zĩig pʋgẽ, bũmb sẽn wit wa bugum n puki, n sig karen-biig fãa zugẽ, tɩ b fãa sɩng n gomd buud-goam toor-toore. Bʋrg sẽn wõnd sob-kẽeng n maan roogã pʋgẽ.

Neb nins sẽn da yi tẽns a taab n wa Zerizalɛmmã wʋma bʋrgã, n zoe n kẽng na n tɩ ges bõe n maan roogẽ wã. B sẽn ta n wʋmd karen-biisã sẽn gomd buud-goam toor-toorã, b yɛɛsame, n sokdẽ yaa: ‘Nin-kãensã pa Galɩle neb sɩda? Maana wãn tɩ b gomd tõnd buudã goama?’

A Pɩyɛɛr ne tʋm-tʋmdb a taabã yikame n yals nebã taoore. A Pɩyɛɛr wilga nebã sẽn sɩng to-to tɩ b wa kʋ a Zeezi, la a  togs-b t’a Zeova vʋʋg-a lame. A yeelame: ‘Masã a Zeezi looga saasẽ, n tɩ be Wẽnnaam nug-rɩtgo. La a kõo tõnd vʋʋsem sõngã wa a sẽn da yeelã. Yaa rẽ yĩng la yel-soalem kãensã sẽn maan tɩ yãmb wʋm la y yã wã.’

A Pɩyɛɛr sẽn yeel bũmb ningã kẽe nebã sũyã, tɩ b sok yaa: ‘Bõe la d segd n maane?’ T’a Pɩyɛɛr yeel-b yaa: ‘Tek-y yam n kos sugr y yel-wẽnã yĩnga, la y reeg koom lisg a Zeezi yʋʋrã yĩnga. Sẽn paase, Wẽnnaam na n kõo yãmb vʋʋsem sõngã.’ Baraare, sẽn ta neb 3000 n paam koom lisgu. Rẽ tɛka, karen-biisã sẽn be Zerizalɛmmã sõor ra tara paasgo. Ne vʋʋsem sõngã sõngre, tʋm-tʋmdbã tõog n lugla tigims wʋsgo, n na n zãms karen-biisã bũmb nins fãa a Zeezi sẽn yeel-bã.