Konima yomasiku omulongo sho Jesus a shuna megulu, aalongwa ye oya li ya tililwa ombepo ondjapuki. Osha li Opentekoste yomo 33 E.N., naantu yokomahala galwe oya li ye ya kuJerusalem, opo ya dhane oshituthi. Mondunda yopombanda megumbo limwe, omwa li mwa gongala aalongwa yaJesus 120 lwaampo. Ohaluka, opwa ningwa oshinima oshikumithi. Oya mono omalaka ga fa gomulilo, nomulongwa kehe okwa lambelwa kulimwe. Ayehe oya tameke okupopya omalaka omakwiilongo. Megumbo omu uvika oshihomo sha fa shombepo yoshikungulu.

Aantu mboka ya li ye ya kuJerusalem okuza kiilongo yilwe, sho yu uvu oshihomo, oya matukile megumbo ya tale shoka tashi ningwa mo. Oya li ya kumwa, sho yu uvu aalongwa taya popi omalaka ngoka. Oya ti: ‘Aantu mbaka oya za kuGalilea. Ongiini ano, sho taya popi omalaka getu?’

Petrus naayapostoli ooyakwawo oya thikama komeho yongundu yaantu. Petrus okwa lombwele aantu nkene Jesus a li a dhipagwa nosho  wo kutya Jehova okwe mu yumudha kuusi. Petrus okwa ti: ‘Ngashingeyi Jesus oku li megulu kolulyo lwaKalunga. Okwa tilile aantu ombepo ondjapuki ndjoka yu uvanekwa, nomolwaashono mwa mono nomu uvu iikumithalonga mbika.’

Aantu sho yu uvu oohapu ndhoka, odhe ya inyengitha noonkondo, noya pula ya ti: “Otu na okuninga shike?” Petrus okwe ya yamukula a ti: ‘Itedhululeni, mu ethe uulunde, ne mu ninginithwe medhina lyaJesus. Otamu ka pewa wo omagano gombepo ondjapuki.’ Mesiku ndyoka, aantu 3 000 lwaampono oya li ya ninginithwa. Okuza mpono, aalongwa oye ende tayi indjipala meendelelo muJerusalem. Kekwatho lyombepo ondjapuki, aayapostoli oya li ya toto po omagongalo ogendji, opo ya vule okulonga aalongwa iinima ayihe mbyoka Jesus e ya lombwele.