Gyisɛse ziale hɔle anwuma la, ye kenle bulu anzi, ye ɛdoavolɛma ne nyianle sunsum nwuanzanwuanza. Ɛnee ɔle Pɛntekɔso 33 Y.M., na ɛnee menli vi ɛleka ngakyile ɛra Gyɛlusalɛm kɛ bɛba bɛarali ɛvoyia ne. Ɛnee Gyisɛse ɛdoavolɛma kɛyɛ 120 ɛyia ɛbolɔsam bie azo. Arɛlevilɛ nu ala, nwanwane debie bie zile. Debie mɔɔ le kɛ senle la razinzele ɛdoavolɛma ne biala ati zo na bɛbɔle ɔ bo bɛhanle aneɛ ngakyile. Dede bie mɔɔ le kɛ ahumu la yile sua ne anu.

Nyɛvolɛ mɔɔ vi maanle ngakyile nu rale Gyɛlusalɛm la dele dede ne, na bɛnriandile bɛhɔle sua nu ɛkɛ ne kɛ bɛkanlea mɔɔ ɛlɛkɔ zo la. Ɔzinle bɛ nwo kɛ bɛdele kɛ ɛdoavolɛma ne ɛlɛka bɛ sua zo aneɛ la. Bɛhanle kɛ: ‘Menli ɛhye mɔ vi Galeli. Kɛ ɔyɛle mɔ bɛlɛka yɛ sua zo aneɛ ne bie ɛ?’

Akee Pita nee ɛdoavolɛma mɔɔ ɛha la dwazole gyinlanle menli ne anyunlu. Pita hanle kɛzi bɛhunle Gyisɛse na Gyihova dwazole ye la  anwo edwɛkɛ hilele bɛ. Pita hanle kɛ: ‘Kɛkala Gyisɛse de Nyamenle asa fema zo wɔ anwuma, na yewola sunsum nwuanzanwuanza ne yegua yɛ nwo zo. Ɛhye ati a bɛde na bɛnwu nwanwane ninyɛne ɛhye mɔ la.’

Pita edwɛkɛ ne hanle bɛ ahonle kpalɛ na bɛbizale kɛ: “Duzu a ɔwɔ kɛ yɛyɛ a?” Ɔzele bɛ kɛ: ‘Bɛnlu bɛ nwo, na bɛmaa bɛzɔne bɛ wɔ Gyisɛse duma nu na bɛbanyia sunsum nwuanzanwuanza ne.’ Kenle zɔhane, bɛzɔnenle menli kɛyɛ 3,000. Ɔvi zɔhane mekɛ ne, ɛdoavolɛma ne anwo bɔle ɔ bo kɛ ɔso wɔ Gyɛlusalɛm. Ɔlua sunsum nwuanzanwuanza ne moalɛ zo, ɛzoanvolɛma ne dele asafo dɔɔnwo amaa bɛahola bɛahilehile ɛdoavolɛma ne ninyɛne kɔsɔɔti mɔɔ Gyisɛse ɛha ɛhile bɛ la.