Jesús jahua pachaman tigrashca punllamantaca ñami 10 punllacuna pasashca carca. Chai qꞌuipami discipulocunaca espíritu santota chasquircacuna. ¿Ima shinataj espíritu santota chasquircacuna? Huata 33-pimi Pentecostés nishca fiestaman shujtaj ladocunamanta Jerusalenman shamurcacuna. 120 discipulocunami huasi jahua pisopi tandanacurcacuna. Chaipica ñapishmi nina lunyacuj shina ricurishpa discipulocunapaj umacunapi tiyarirca. Qꞌuipaca tucuicunami chꞌican chꞌican shimicunapi rimai callarircacuna. Ashtahuanpish shuj jatun huaira huajiashcami chai huasipica uyarirca.

Jerusalenman shamuj gentecunaca huaira huajiacushcata uyashpami ima tucushcata ricunaman callpashpa rircacuna. Chayajpica discipulocuna shujtaj shimicunapi rimacujta uyashpami mancharircacuna. ‘Cai gentecunaca Galileamantamari can, ¿ima shinataj ñucanchij rimashca shimipi rimai tucuncuna?’ nircacunami.

 Chaimi Pedroca apostolcunandij tucuicunapaj ñaupajpi shayarircacuna. Pedroca, ‘cancunaca Jesustami huañuchircanguichij. Pero Diosmi paitaca causachirca. Cunanca Jesusca Diospaj alli ladopimi tiyacun. Pai cusha nishca Diospaj espiritutapish cushcami. Chaimi milagrocunata rurashcata ricushcanguichij, uyashcanguichij’ nircami.

Chaita uyashpami gentecunaca shungumanta llaquirishpa Pedrotaca, ‘¿imatataj rurana canchij?’ nircacuna. Pedroca, ‘juchacunamanta arrepintirichij, Jesuspaj shutipi bautizarichij. Espíritu santota chasquinguichijmi’ nircami. Chai punllaca, 3.000 gentecunami bautizarircacuna. Chai punllamantami Jerusalenpica discipulocunaca ashtahuan mirarircacuna. Apostolcunaca Diospaj espirituta chasquishpami congregacioncuna mirarishpa catichun ayudarcacuna. Chashnami discipulocunaman Jesús mandashcataca yachachijcuna carca.