10 punchawña hanaq pachaman Jesuspa ripukusqan pasaruptinmi, pentecostes fiesta karqa 33 watapi. Chaymi huk lawkunamantapas achkallaña runakuna Jerusalenman hamurqaku. Chaypitaqmi 120 Jesuspa qatiqninkunapas wasipa altosninpi huñunasqa kachkarqaku, hinaptinmi qunqayllamanta sapakamapa umankupi nina ratachkaq hina rikurirurqa. Chaynatam llapallankuman chuya espiritu huntaykuptin huk rimaykunapiña sapakama rimayta qallaykurqaku. Chaymantapas chay wasipim sinchi wayrapa qaparisqan uyarikururqa.

Chayta uyarispankum huk lawmanta hamuqkunapas chay wasiman kallparqaku ima kasqanta yachanankupaq. Chayaruspankuñataqmi uyarirurqaku Jesuspa qatiqninkuna huk rimaykunapiña rimasqankuta, hinaspam nirqaku: “¡Imaynamá Galilea runakunaqa rimayninchikkunapiña rimachkanku!”, nispa.

Hinaptinmi Pedrowan apostolmasinkuna llapallankupa qayllanpi sayaykurqaku. Chaypim Pedro nirqa: “Jesusta wañurachiptikichikpas Diosmi kawsarirachin. Kunanqa Jehova Diospa alliq lawninpiñam  kachkan, hinaspapas niwasqankuman hinam chuya espirituta quykuwanku. Chayraykum kaykunata qawachkankichik”, nispa.

Pedropa chayna rimasqan sunqunkuman chayaruptinmi runakunaqa tapukurqaku: “¿Imatataq ruwallaymanku?”, nispa. Pedroñataqmi nirqa: “Huchaykichikmanta wanakuspayá Jesuspa sutinpi bautizakuychik, hinaspam chaskinkichik chuya espirituta”, nispa. Hinaptinmi 3.000 runakuna chay punchawlla bautizakururqaku. Chaymantapacham Jesuspa qatiqninkunaqa astawan yapakurqaku. Chaymi Jesuspa apostolninkunaqa chuya espiritupa yanapakuyninwan iñiqmasinkuta yanaparqaku achka hawaqpiña huñunakunankupaq. Chaynapimá yachachirqaku Jesuspa lliw kamachisqankunata.