Деш диве откеда о Исус иранѓа пе ко небо, лескере ученикија добинѓе свети дух. Адава уло ки Педесетница 33 берш а.е. Ко акава празнико ко Ерусалим але бут мануша таро бут пхувја. Ки упруни соба таро јекх кхер сине кхедиме околу 120 ученикија е Исусескере. Таро јекх пути уло нешто чудно. Упро ленгере шере појавинѓа пе нешто со личинела сине сар јаг, хем о ученикија почминѓе те керен лафи ко различна чхибја. Ки соба шундило силно звуко тари балвал.

Акава звуко шунѓе чак несаве мануша со але таро јавера тхана хем одма прастандиле ко кхер те дикхен со уло. Ола сине бут изненадиме кеда шунѓе кај о ученикија керена лафи ко разна чхибја. Ола вакерѓе: „Нане ли акала мануша тари Галилеја? Сар шај те керен лафи ко амаре чхибја?“

Пало адава о Петар хем о јавера апостолија ачхиле англо народо. О Петар вакерѓа ленге сар сине мудардо о Исус хем сар о Јехова воскреснинѓа ле. Ов вакерѓа: „Акана о Исус тано ко небо  тари десно страна е Девлескири хем денѓа амен свети дух сар со ветинѓа аменге. Адалеске дикхена акала чудија“.

О мануша бут сине погодиме таро лафија е Петарескере. Адалеске пучле: „Со те кера?“ О Петар одговоринѓа ленге: „Кајнен тумен башо тумаре гревија хем крстинен тумен е Исусеске ко анав. Тегани тумен да ка добинен свети дух сар поклон“. Адава диве крстинѓе пе околу 3.000 џене. Оттегани о број е учениконгоро почминѓа бут сиг те бајрол. О свети дух поможинѓа е апостоленге те керен повише собранија. Аѓаар шај сине те сикавен е јавере ученикон башо са адава со сикавѓа лен о Исус.