Deš dive otkeda o Isus irangja pe ko nebo, leskere učenikija dobingje sveti duh. Adava ulo ki Pedesetnica 33 berš a.e. Ko akava prazniko ko Erusalim ale but manuša taro but phuvja. Ki upruni soba taro jekh kher sine khedime okolu 120 učenikija e Isuseskere. Taro jekh puti ulo nešto čudno. Upro lengere šere pojavingja pe nešto so ličinela sine sar jag, hem o učenikija počmingje te keren lafi ko različna čhibja. Ki soba šundilo silno zvuko tari balval.

Akava zvuko šungje čak nesave manuša so ale taro javera thana hem odma prastandile ko kher te dikhen so ulo. Ola sine but iznenadime keda šungje kaj o učenikija kerena lafi ko razna čhibja. Ola vakergje: „Nane li akala manuša tari Galileja? Sar šaj te keren lafi ko amare čhibja?“

Palo adava o Petar hem o javera apostolija ačhile anglo narodo. O Petar vakergja lenge sar sine mudardo o Isus hem sar o Jehova voskresningja le. Ov vakergja: „Akana o Isus tano ko nebo  tari desno strana e Devleskiri hem dengja amen sveti duh sar so vetingja amenge. Adaleske dikhena akala čudija“.

O manuša but sine pogodime taro lafija e Petareskere. Adaleske pučle: „So te kera?“ O Petar odgovoringja lenge: „Kajnen tumen bašo tumare grevija hem krstinen tumen e Isuseske ko anav. Tegani tumen da ka dobinen sveti duh sar poklon“. Adava dive krstingje pe okolu 3.000 džene. Ottegani o broj e učenikongoro počmingja but sig te bajrol. O sveti duh pomožingja e apostolenge te keren poviše sobranija. Agjaar šaj sine te sikaven e javere učenikon bašo sa adava so sikavgja len o Isus.