Yesuusi iimira haˈrihunni tonnu barri gedensaanni rosaanosira qullaawu ayyaani dirrinsa. Kuni ikkinohu 33 M.D., Phenxeqosxete barraati; hakko barra ayyaana ayirrisara batinye gobbanni dayino manni Yerusaalamete no. Hakkiicho 120 ikkitannori Yesuusi rosaano fooqete mine gamba yite no. Hedeweelcho mittu dhagge ikkanno coyi ikki. Mitte mittente rosaano umira giirate buwano lawannori dirrinsa; hakkiinni baalunku babbaxxino qaalinni coyiˈra hanaffu. Hombobalattete gede luulu mine woˈmi.

Wole gobbanni Yerusaalame dayino manni luulo macciishshe ikkinore laˈˈara dodanni hakkira mari. Mannu, rosaano babbaxxino qaalinni coyidhanna macciishshe dhagge assiˈrino. Togo yiino: ‘Kuni Galiilu mannaati. Kayinni ninke afoo coyiˈra dandiinohu hiittoonniiti?’

Hakkiinni Pheexiroosinna wole soqqamaasine mannu baalunku albaanni uurritu. Pheexiroosi Yesuusi shinoonni garanna Yihowa reyotenni kayisinosi gara mannaho kuli. Togo yiino: ‘Xa Yesuusi  iima Maganu qiniiteenni no; qoleno dirriseemmo yee qaale eino ayyaanano dirrisino. Tenne maalale laˈinoonnihunna macciishshitinoonnihu iseraati.’

Mannu Pheexiroosi coyiˈrinore macciishshe lowo geeshsha dhagge assiˈre, “Xa ma assino?” yii. Isi togo yiinsa: ‘Cubbiˈnera maaro eˈine Yesuusi suˈminni cuuamme. Hakkiinni qullaawu ayyaani elto adhitinanni.’ Hakko barra 3,000 meddi yaanno manni cuuamino. Hatte yannanni kayise, Yerusaalamete katamira rosaanote kiiro rakke lexxitanni hadhino. Soqqamaasine, Yesuusi hajajinonsare baala rosaanote rosiisa dandiitanno gede, qullaawu ayyaani kaaˈlonni duucha songuwa xintitino.