Ina ua mavae aso e sefulu talu ona toe afio Iesu i le lagi, ona maua lea e ona soo o le agaga paia. I le Penetekoso 33 T.A., na ō atu i Ierusalema tagata mai i le tele o vaipanoa e faamanatu le Penetekoso. E pe ā ma le 120 soo o Iesu na faapotopoto i le potu pito i luga o se fale. Na faafuaseʻi ona tupu ai o se mea ofoofogia. Na vaaia se mea e pei o se afi i luga aʻe o ulu o soo taʻitasi, ma na amata ona latou tautatala i gagana eseese. Na tumu le fale atoa i se leo e pei o se matagi malosi.

Na faalogoina e tagata na faimalaga atu i Ierusalema lenā leo, ma tamomoʻe atu i le fale e vaai po o le ā le mea ua tupu. Na taufaiofo i latou ina ua faalogo atu o tautatala le ʻausoo i gagana eseese. Na latou faapea ane: ʻO nei tagata e mai i Kalilaia. E faapefea ona latou iloa tautatala i a tatou gagana?’

Ona tutū lea o Peteru ma isi aposetolo i luma o tagata. Na faamatala atu e Peteru le auala na fasiotia ai Iesu, ma na toe faatūina  o ia e Ieova mai i le oti. Na faapea atu Peteru: ʻO loo i le lagi Iesu i le itu taumatau o le Atua, ma ua ia liligiina mai le agaga paia lea na ia folafolaina mai. O le māfuaaga lea ua outou vāai ma faalogo ai i nei vavega.’

Na matuā pāʻia loto o tagata i upu a Peteru, ma na latou fesili atu: “O le ā se mea e ao ona matou faia?” Na tali mai Peteru: ʻIa salamō mai i a outou agasala, ma ia papatiso i le suafa o Iesu. O le a outou maua foʻi le meaalofa o le agaga paia.’ I lenā aso, pe tusa ma le 3,000 tagata na papatisoina. Talu mai lenā taimi, na vave ona faatoʻateleina le ʻausoo i Ierusalema. O le fesoasoani a le agaga paia, na amataina ai e le ʻauaposetolo le tele o faapotopotoga, ina ia mafai ai ona latou aʻoaʻoina le ʻausoo i mea uma na faatonuina ai i latou e Iesu.