Tin dei baka di Yesus go na hemel den disipel fu en kisi santa yeye. A sani disi pasa na a Pinksterfesa fu a yari 33, di sma fu difrenti presi ben kon na Yerusalem fu hori a fesa disi. Sowan 120 disipel fu Yesus ben kon makandra na ini wan kamra na a sodro fu wan oso. Wantronso wan wondru pasa. Wan sani di gersi faya kon na tapu na ede fu ibri disipel, dan den bigin taki difrenti tongo. Wan babari leki di fu wan tranga winti furu na oso.

Sma fu difrenti kondre di ben kon na Yerusalem yere a babari èn den lon go na a oso fu si san ben e pasa. Den ben fruwondru di den yere den disipel e taki difrenti tongo. Den taki: ’Ma den sma disi na fu Galilea. Fa den man taki ala den tongo di wi e taki?’

Ne Petrus nanga den tra apostel go tanapu na fesi den sma. Petrus fruteri den fa sma kiri Yesus èn taki Yehovah gi en wan opobaka. Petrus taki: ’Now Yesus de na hemel na a reti-anusei fu Gado èn a seni a santa yeye di a ben pramisi wi. Dati meki unu si a wondru disi.’

 Den sani di Petrus taigi den sma naki den ati. Dati meki den aksi en: ’San wi musu du?’ A taigi den: ’Un musu abi berow fu den sondu fu unu èn un musu dopu na ini a nen fu Yesus. Unu o kisi a santa yeye di Gado e gi sma fu soso.’ Na a dei dati 3000 sma dopu. Sensi a ten dati, moro nanga moro sma na ini Yerusalem tron disipel fu Yesus. Fu di a santa yeye yepi den apostel, meki den ben man seti moro gemeente. Na so den ben man leri den disipel ala den sani di Yesus taigi den.