Mapul᷊o ěllo bọu i Yesus nẹ̌bal᷊ị sarang sorga, manga murite nakatarimạ rohkẹ̌ masusi. Su tempo ene piạ Perayaan Pentakosta, su taung 33 M, kụ taumata bọu haghing tampạ diměnta su perayaan ene. Ěndịu piạ 120 muritẹ̌ nẹ̌komol᷊ẹ̌ su ruangan bageang dasị su sěmbaụ bal᷊e. Sěngkělěndịu, piạ barang makạlaherang nariadi. Piạ tingihẹ̌ kere tingihu anging maihạ su wal᷊e ene. Bọu ene, piạ barang kere putung siměpụ su wowong těmbọ i sire sěngkatau-sěngkatau, kụ i sire nakapẹ̌bisara su haghing bawera.

Taumata bọu negeri wal᷊inẹ apang diměnta su Yerusalem nakaringihẹ̌ tingihẹ̌ ene. I sire masahawụ nakoạ sarang bal᷊e ene gunang makasingkạ apa nariadi. I sire himěkosẹ̌ su tempong manga muritẹ̌ nẹ̌bisara něpakẹ werang i sire hala. I sire nẹ̌bera, ’I sire ini bal᷊inẹbe tau Galilea? Kawe i sire botonge mẹ̌bisara su werang i kitẹ hala?’

Bọu ene, i Petrus dingangu manga rasulẹ̌ bal᷊inẹ dimarisị su těngong taumata ene. I Petrus naul᷊ị si sire i Yesus nipate kụ i Yehuwa  seng saụ napakawiahẹ̌ si sie. I Petrus nẹ̌bera, ’Orasẹ̌ ini i Yesus seng su sorga, su sěmběka koanengu Mawu, kụ i sie něgělị rohkẹ̌ masusi seng niriandine. Hakị u ene, i kamene nakasilo dingangu nakaringihẹ̌ mukjizat nariadi sahěllo ini.’

Naungu taumata sene sěbạe nakanoạ ual᷊ingu apa niul᷊ị i Petrus, kụ i sire nẹ̌kiwal᷊o, ”Apa harusẹ̌ koateng i kami?” I sie nẹ̌bera si sire, ’Pẹ̌tobatẹ̌ bọu rosang i kamene, kụ i kamene harusẹ̌ pakisahani su ral᷊ungu areng i Yesus. I kamene lai sarung makatarimạ rohkẹ̌ masusi.’ Sahěllo ene, ěndịu piạ 3.000 taumata nisahani. Dongkeng tempo ene, tumatol᷊eng i Yesus su Yerusalem masahawụ natamba. Ual᷊ingu tul᷊umang rohkẹ̌ masusi, manga rasulẹ̌ něndarisị limembong mal᷊awọ sidang tadeạu i sire botonge měněntiro manga muritẹ̌ soal u kěbị apa seng nitěntirong i Yesus si sire.