Ninújngoo má mbá 10 mbiʼi asndu nákha Jesús nitanga̱a̱ mekhuíí. Ikhú xa̱bi̱i̱ Jesús nindrigú xi̱ʼ kaʼwu. Índo̱ xtáa rarígá ndxa̱a̱ ndrígóo Pentecostés tsiguʼ 33, ga̱jma̱a̱ xa̱bu̱ bi̱ naguwáʼ náa i̱ʼwáʼ xuajen niguánu náa Jerusalén mu muniriyaaʼ ndxa̱a̱ rígi̱. Mbá 120 xa̱bi̱i̱ Jesús nigimbíin náa mbá guʼwá dí grigu rijma̱a̱, índo̱ mbá nacha̱ nirígá mbá rí mitsaan wéñuʼ. Asndu xóo mbá riʼyu̱u̱ aguʼ nirigu náa edxu̱u̱ mámbáa discípulo, ga̱jma̱a̱ xúgínʼ nigi̱ʼdi̱i̱ nithi mixtiʼkhu ajngáa. Ma̱ngaa, nirígá rí niwáán asndu xóo mbá giñánʼ gakhi̱i̱ wéñuʼ náa xúgíʼ guʼwá.

Xa̱bu̱ bi̱ niguwaʼ náa Jerusalén bi̱ ni̱ndxu̱ún náa i̱ʼwáʼ xuajen nidxawíín rí niwáán ga̱jma̱a̱ nigáñun nigún náa guʼwá mu mbuyáá ndiéjunʼ erígá. Niʼniún tsiánguá índo̱ nidxawíín rí discípulos nuthi i̱ʼwáʼ ajngáa. Nithi: “Xa̱bu̱ bugi̱ naguwáʼ náa Galilea, xú káʼnii nandoo nuthi ajngúlú xá.”

Ikhú Pedro ga̱jma̱a̱ eʼwíínʼ apóstoles niguájun náa inún xúgínʼ. Pedro niʼthún: “Ikháanʼ nixíyáala Jesús, mú Jeobá nikuxi̱i̱. Rí xúgi̱ Jesús gíiʼ  náa ñawún mújúnʼ Dios. Ga̱jma̱a̱ nixnúxu xi̱ʼ kaʼwu rí nikudaminaʼ maxnúxu. Ikha jngó ndi̱ya̱a̱ ga̱jma̱a̱ nidxáwiin milagro rígi̱”.

Xa̱bu̱ niguanún tsiánguá. Ajngáa rí niʼthí Pedro nirkao asndu náa a̱jkiu̱ún, ikha jngó niraximíjna̱: “Ndiéjunʼ gíʼmaa munixu rá.” Ikhaa niriʼñún: “Gatanga̱a̱ a̱jkia̱la náa aʼkhá rí nixuʼdámi̱jna̱ ga̱jma̱a̱ gajnguála iyááʼ ga̱jma̱a̱ mbiʼyuu Jesús. Nda̱wa̱á mangáanʼ mundrigúla regalo ndrígóo xi̱ʼ kaʼwu”. Mbá 3,000 xa̱bu̱ nijngún iyááʼ mbiʼi rúʼko̱. Asndu nákha mbiʼi rúʼko̱, nigi̱ʼdu̱u̱ nikuwa itháan discípulos náa Jerusalén. Xi̱ʼ kaʼwu nimbáñun apóstoles mu mugíʼ i̱ʼwáʼ congregación. Xúʼko̱ nindoo discípulos musngáa xúgíʼ rí Jesús niʼthún muni.