Loron sanulu liu tiha depois Jesus fila fali ba lalehan, ninia dixípulu sira simu espíritu santu. Neʼe mak loron Pentekostes tinan 33 EC no ema barak husi fatin oioin bá Jeruzalein atu selebra loron neʼe. Maizumenus dixípulu naʼin-120 halibur hamutuk iha kuartu ida iha andár leten. Derrepente buat furak ida akontese. Sira rona lian tarutu hanesan anin huu makaʼas. Tuirmai buat ruma hanesan ahi tun iha sira ida-idak nia ulun leten no sira komesa koʼalia língua oioin.

Ema husi nasaun seluk neʼebé mai Jeruzalein no rona lian neʼe, sira halai ba uma neʼe atu buka-hatene saida mak akontese. Sira hakfodak bainhira rona dixípulu sira koʼalia sira-nia língua. Sira dehan: ‘Ema sira-neʼe mak ema Galileia. Oinsá mak sira bele koʼalia ita-nia língua?’

Tuirmai Pedro no apóstolu seluk hamriik iha ema-lubun nia oin. Pedro esplika kona-ba oinsá ema oho Jesus no Jeová halo  Jesus moris hiʼas fali. Pedro dehan: ‘Agora Jesus iha ona lalehan no tuur iha Maromak nia liman-loos, no nia fakar ona espíritu santu hanesan nia promete nanis. Tan neʼe mak imi rona no haree milagre sira-neʼe.’

Pedro nia liafuan book tebes ema nia laran no sira husu: ‘Ami tenke halo saida?’ Pedro dehan: ‘Arrepende imi-nia sala no hetan batizmu hodi Jesus nia naran. No imi mós sei simu espíritu santu.’ Iha loron neʼe, maizumenus ema naʼin-3.000 hetan batizmu. Hahú husi loron neʼebá, dixípulu sira aumenta lalais iha Jeruzalein. Ho espíritu santu nia ajuda, apóstolu sira harii kongregasaun barak atu bele hanorin dixípulu sira kona-ba Jesus nia mandamentu hotu.