Endzhaku ka masiku ya khume Yesu a tlhelele etilweni, vadyondzisiwa vakwe va amukele moya lowo kwetsima. A ku ri hi Pentekosta ya 33 C.E., naswona vanhu a va ye eYerusalema leswaku va ya tlangela nkhuvo wolowo. Vadyondzisiwa va Yesu va kwalomu ka 120 a va hlengeletane ekamareni ra le henhla. Hiloko ku humelela nchumu wo hlamarisa. Etinhlokweni ta vona a ku ri ni nchumu lowu fanaka ni langavi ra ndzilo, naswona va sungule ku vulavula tindzimi to hambanahambana. Ku twakale mpfumawulo lowu fanaka ni wa xidzedze ekamareni leri a va ri eka rona.

Vaendzi lava a va te eYerusalema va twe mpfumawulo wolowo kutani va tsutsumela ekamareni rero, ku ya vona leswi a swi humelela. Va hlamarile loko va twa vadyondzisiwa volavo va vulavula tindzimi to hambanahambana. Va te: ‘Kambe vanhu lava va huma eGaleliya. Va ti tivela kwihi tindzimi ta hina?’

Kutani Petro ni vaapostola van’wana va yime emahlweni ka  ntshungu wolowo. Petro u va byele ndlela leyi Yesu a dlayiweke ha yona ni leswaku Yehovha u n’wi pfuxile eku feni. Petro u te: ‘Sweswi Yesu u le tilweni, evokweni ra Xikwembu ra xinene naswona u chululele moya lowo kwetsima hilaha a tshembiseke hakona. Hi yona mhaka mi tweke ni ku vona masingita lawa.’

Ntshungu wolowo wu khumbiwe hi marito ya Petro lerova wu vutisa wu ku: “Hi fanele hi endla yini?” Petro u te: ‘Hundzukani eswidyohweni swa n’wina naswona mi khuvuriwa hi vito ra Yesu. Na n’wina mi ta amukela nyiko ya moya lowo kwetsima.’ Hi siku rero, ku khuvuriwe vanhu va kwalomu ka 3 000. Ku sukela kwalaho, vadyondzisiwa va sungule ku andza hi ku hatlisa eYerusalema. Hi ku pfuniwa hi moya lowo kwetsima, vaapostola va simeke mavandlha yo tala leswaku va ta kota ku dyondzisa vadyondzisiwa swilo hinkwaswo leswi Yesu a va leriseke swona.