Andzhako ka 10 wa masiku Jesu na a tlhelile tilweni, a vapizani vakwe va no amukela moya wa ku basa. Ku wa hi Pentekosta wa 33 Nguveni ya Hina, niku a vanhu va ngata hi ka matshamu yo hambanahambana va wa tlhangene le Jerusalema kasi va maha festa. Lomu ka yindlu yo kari ya le hehla, ku wa hi ni 120 wa vapizani va Jesu va nga tlhangene. Ku no maheka nchumu wo hlamalisa hi citshuketi. Laha hehla ka tihloko ta vapizani va Jesu ku no woneka nchumu wo fana ni ndzilo, vontlhe va sangula ku wulawula tirimi to hambanahambana. Lomu ndlwini yontlhe ku no zwala guwa ga hombe go fana ni ga moya wa hombe.

Lava va nga tile laha Jerusalema hi ka matiko man’wani va nozwa guwa lego zvonake va tsutsuma vaya lomu ndlwini kasi va ya wona lezvi zvi nga kari zvi maheka. Va no hlamala nguvhu a cikhati leci va ngazwa vapizani va Jesu na va wulawula tirimi leto to hambanahambana. Va no wula lezvi: ‘Phela lava vata hi le Galileya. Maku va zvi kotisa kuyini ku wulawula tirimi ta hina’?

Pedro ni vapostoli van’wani va no gumesa va yima laha phambeni ka vanhu, zvonake Pedro a tlhamusela vanhu lezvi Jesu a nga dayiswa zvona  ni lezvaku Jehovha i mu vhuxile hi ka vafileko. A tlhela aku: ‘Zvezvi Jesu i le tilweni laha tlhelweni ga cinene ga Nungungulu. Makunu i chululile a moya wa ku basa lowu a nga wu tsumbisa. Hi wona wu mahako lezvaku mu wona mu tlhela muzwa zvihlamaliso lezvi’.

A vanhu va no khumbeka nguvhu hi lezvi Pedro a nga wula, zvonake va mu wutisa lezvi: ‘Zvini hi faneleko ku maha’? I no va byela lezvi: ‘Ti soleni zviwonho zva n’wina mu tlhela mu bhabhatiswa vitweni ga Jesu, n’winawu mu ta amukela a cinyikiwo leci ca moya wa ku basa’. Ka siku lego, ku no bhabhatiswa 3000 wa vanhu. Kusukela kwalaho, a vapizani va Jesu le Jerusalema va no sangula ku engetela va tala nguvhu hi kuhatlisa. A vapostoli va no wumba mabandla yo tala hi ku vhuniwa hi moya wa ku basa, kasi va va gondzisa kona a vapizani lavo zvontlhe lezvi Jesu a nga va rumile.