Иисус дээрже үне берген соонда, 10 хонук эрткенде, ооң өөреникчилери ыдыктыг сүлде алган. Ол чүүл бистиң эраның 33 чылда Беженги хүннүң байырлалында болган. Ол хүнде Иерусалимге аңгы-аңгы черлерден дыка хөй улус чедип келген. А Иисустуң 120 өөреникчизи бир бажыңның кырыккы өрээлинге чыглып келген. Оон аңаа кайгамчык чүүл болган. Кижи бүрүзүнүң бажынга отка дөмей чүүл көзүлген соонда, олар аңгы-аңгы дылдарга чугааланып эгелээн. Хенертен дыка күштүг хат хадаан дег, дааш дыңналган.

Аңгы-аңгы чурттардан келген улус ол даашты дыңнап кааш, ол бажыңда чүү болуп турарын көөр дээш халып чеде берген. Өөреникчилерниң янзы-бүрү дылдарда чугааланып турарын дыңнааш, олар аажок кайгаан! «Бо улус Галилеядан ийик чоп. Бистиң дылывысты кайыын билир улус боор?» — дижип турганнар.

Ынчан Пётр болгаш өске элчиннер улус мурнунга үнүп келгеш, Иисус өлүрткен база Иегова ону диргизипкен деп чугаалап эгелээн.  Пётр: «Ам Иисус дээрде Бурганның оң талазында олурупкан. Ол аазаан ыдыктыг сүлдезин бээрге, бо хуулгаазыннарны көрүп турар-дыр силер» — дээн.

Улус Пётрнуң сөстерин дыңнааш, аажок кайгап айтырган: «Бис ам чүнү канчаар ужурлуг бис?» Пётр оларга: «Бачыттарыңар миннип, Иисустуң ады-биле сугга суктуруп алыңар, ынчан ыдыктыг сүлдени алыр силер» — дээн. Ол хүн 3 000 хире кижи сугга суктуруп алган. Оон бээр Иерусалимге өөреникчилер саны көвүдеп-ле орган. Элчиннер Иисустуң айтыышкыннарынга хөй чаа улусту өөредир дээш, ыдыктыг сүлдениң ачызында чыыштар тургузуп эгелээн.