Noke yoloneke ekũi tunde eci Yesu a tiukila kilu, olondonge viaye via tambula espiritu sandu. Ca kala ko Pendekoste yunyamo wa 33 K.K., kuenda omanu vo kolonepa viosi veya ko Yerusalãi kocipito. Kua kala eci ci soka 120 kolondonge via Yesu okuti via liongoluile vohondo yimue kosapalalo. Vocipikipiki, kua pita cimue ci komõhisa. Ocina caco, ci kasi ndulienge wondalu okuti, ca molẽha kovitue violondonge viosi kuenje va fetika oku vangula alimi a litepa. Onjuela yimue ndokuõla kuofela yalua, ya yevala vonjo yosi.

Omanu vana va tunda kolofeka vikuavo okuti va kala vo Yerusalãi, va yeva onjuela yaco kuenje va lupukila vonjo yaco oco va ka tale eci ca kala oku pita. Eci va yeva okuti olondonge via kala oku vangula alimi a litepa va komõha. Kuenje va popia vati: ‘Omanu ava va Galilea. Pole, va tẽla oku vangula ndati alimi etu?’

Noke Petulu kuenda ovapostolo vakuavo va talama kovaso yowiñi. Petulu wa sapuila omanu ndomo Yesu a pondiwa kuenda wa va sapuilavo okuti Yehova wo pindula kolofa. Petulu wa popia hati: ‘Cilo  Yesu o kasi kilu kondio ya Suku kuenda wa tuma espiritu sandu a likuminyile. Eli olio esunga lieci wa yeveli loku mola ovikomo viaco.’

Omanu va vetiyiwa calua lolondaka via Petulu kuenje va pula vati: ‘Nye tu sukila oku linga?’ Eye wa va sapuila hati: ‘Likekembeli akandu ene kuenda papatisiwili vonduko ya Yesu. Kuenje vu tambulavo ocali cespiritu sandu.’ Keteke liaco, kua papatisiwa eci ci soka 3.000 komanu. Tunde keteke liaco, olondonge via fetika oku livokiya calua ko Yerusalãi. Lekuatiso liespiritu sandu, ovapostolo va tumbika akongelo alua oco va longise olondonge ovina viosi Yesu a va tuma.