Vhafunziwa vho wana muya mukhethwa nga murahu ha maḓuvha a fumi musi Yesu o no vhuyelela ṱaḓulu. Ho vha hu Pentekoste ya 33 C.E. nahone vhathu vho vha vho ḓa Yerusalema u pembela vha tshi bva fhethu ho fhamba-fhambanaho. Ho vha ho kuvhangana vhafunziwa vha Yesu vha 120 kamarani ya nṱha. Nga kathihi, ha mbo ḓi itea zwiṅwe zwithu zwi mangadzaho. Ha mbo ḓi vhonala tshithu tshi ngaho khavhu ya mulilo nṱha ha ṱhoho dza mufunziwa vhoṱhe, nahone vhoṱhe vha thoma u amba nyambo dzo fhamba-fhambanaho. Ha mbo ḓi pfala mubvumo muhulu nḓuni u ngaho wa ḓumbu.

Vhathu vhe vha vha vho dala Yerusalema vha pfa wonoyu mubvumo vha gidima vha tshi ḓa kha yeneyo nnḓu u itela u vhona zwe zwa vha zwi tshi khou itea. Vho vha vho mangala musi vha tshi khou pfa vhafunziwa vha tshi khou amba dzenedzo nyambo. Vha ri: ‘Avha vhathu vhane vha khou amba vha bva Galilea musi. Zwi ḓa hani uri vha ambe nga nyambo dzashu?’

Petro na vhaṅwe vhaapostola vha ima phanḓa ha gogo ḽa vhathu. Petro a vhudza vhathu nga ha nḓila ye Yesu a vhulawa ngayo na uri  Yehova o mu vusa vhafuni. Petro a ri: ‘Zwino Yesu u ṱaḓulu thungo ya tshanḓa tsha u ḽa tsha Mudzimu nahone o ri shululela muya mukhethwa we a ri fulufhedzisa. Ndi ngazwo ni tshi khou vhona na u pfa nga ha honovhu vhuṱolo.’

Vhathu vho kwamea vhukuma nga zwe Petro a zwi amba nahone vha vhudzisa uri: “Ri ite mini?” A amba navho, a ri: ‘Rembuluwani zwivhini zwaṋu nahone ni lovhedzwe dzinani ḽa Yesu. Ni ḓo kona u wana tshifhiwa tsha muya mukhethwa.’ Nga ḽeneḽo ḓuvha, ho lovhedzwa vhathu vha ṱoḓaho u vha 3 000. U bva tsheetsho, vhafunziwa vha engedzea ngei Yerusalema nga u ṱavhanya. Vha tshi thuswa nga muya mukhethwa, vhaapostola vho thoma zwivhidzo zwinzhi u itela uri vha funze vhafunziwa zwoṱhe zwe Yesu a vha vhudza.