Evinre ene mahiku 10, nuumala Yesu otthikela wiirimu, awiixutti awe yaahaakhela munepa wootteela. Eyo yiiraneyale nihiku na Pentekoositi a 33 EC, ni oYerusalemu yaahirwa atthu a ilapo sinceene wuupuwelela niira. Yaahikhala awiixutti a Yesu 120 yaathukumanne esaala ya vasulu. Mootutuxerya, yaahikhumelela etthu yootikiniha. Yaahikhumelela etthu ntoko malumi a mooro vamuru va khula mutthu aari esaala ele, ni atthu otheene yaahipacerya olavula mattaava oovirikana. Enupa yotheene waahiiwanyeya onyakula, waalikana ni epheyo yuulupale.

Atthu yaakhuma ilapo sikina yaarwiiye oYerusalemu, vaiwale aya onyakula iwo, yaahitthimakela enupa ele wira yawehe etthu yiiraneya. Awo yaahitikiniheya okhala wira khula mutthu aaniwiiwa awiixutti elavulaka ni nttaava naya. Atthu awo yaahikohana so: ‘Atthu ala othene khahiyo aGalileya? Vano vaniweryaneya sai olavulaka mattaava ahu?’

Pedru ni arummwa akina yaaheemela ohoolo wa muttitthi ole wa atthu. Pedru aahaaleela atthu ale moota Yesu aiviwe awe ni moota  Yehova aamuhihimunxe awe mookhwaani. Pedru aahihimya so: ‘Vano Yesu ori wiirimu moono woolopwana wa Muluku, ni oonikawela munepa wootteela waaleiheriwe. Ti maana aya munoona anyu ni wiiwa miiriirya iya’.

Okathi atthu yaiwale aya moolumo a Pedru, yaahitikinihiwa nto yaahikoha so: ‘Vano nipakeke exeeni?’ Owo aahiwaakhula so: ‘Muttharuwe opaka itthu soohiloka ni mbatiziwe ni nsina na Yesu. Nave munoovahiwa munepa wootteela’. Nihiku nle atthu oowiiraka 3.000 yaahibatiziwa. Okhuma vaavo, awiixutti yaahipacerya wuncerereya mowaakuveya oYerusalemu. Ekhaliheriwaka ni munepa wootteela, arummwa yaahipaka miloko sinceene, nto vano yanwerya owiixuttiha atthu otheene itthu sotheene Yesu aarumme awe.