Paglabay hin napulo ka adlaw tikang han bumalik hi Jesus ha langit, an iya mga disipulo nakakarawat hin baraan nga espiritu. Pentekostes 33 C.E. adto, ngan an mga tawo ha damu nga lugar kumadto ha Jerusalem basi magselebrar. Ha igbaw nga kwarto han usa nga balay, may mga 120 nga disipulo nga nagkakatirok. Tigda la nga may urusahon nga nahitabo. May nakita nga sugad hin kalayo ha ulo han tagsa nga disipulo, ngan nagtikang hira magyakan hin iba-iba nga linggwahe. Nabatian ha bug-os nga balay an aringasa nga pariho hin makusog nga hangin.

An mga bisita tikang ha iba nga mga lugar nakabati han aringasa ngan nagdadlagan pakadto ha balay basi makita an nahitatabo. Nahipausa hira han hinbatian nira nga an mga disipulo nagyayakan hin iba-iba nga linggwahe. Hira nagsiring: ‘Di’ ba mga taga-Galilea ini nga mga tawo. Kay ano nga nakakayakan hira han aton mga linggwahe?’

Tapos, hi Pedro ngan an iba pa nga apostol tumindog ha atubangan han mga tawo. Iginsumat ni Pedro kon paonan-o ginpatay hi Jesus pati an  pagbanhawa ha iya ni Jehova. Hiya nagsiring: ‘Yana, hi Jesus aadto na ha langit ha too nga kamot han Dios, ngan iya iginbuhos an baraan nga espiritu nga iya iginsaad. Salit iyo nakita ngan nabatian ini nga mga milagro.’

Nabantad gud an kasingkasing han mga tawo ha ginsiring ni Pedro, salit nagpakiana hira: “Ano an amon bubuhaton?” Ginsidngan hira ni Pedro: ‘Pagbasol kamo han iyo mga sala ngan magpabawtismo ha ngaran ni Jesus. Makakarawat liwat niyo an regalo nga baraan nga espiritu.’ Hito nga adlaw, mga 3,000 an nabawtismohan. Tikang hito, madagmit gud nga nagtikadamu an mga disipulo ha Jerusalem. Ha bulig han baraan nga espiritu, an mga apostol nag-establisar hin dugang nga mga kongregasyon basi matutdoan nira an mga disipulo han ngatanan nga iginsugo ha ira ni Jesus.