Pantekoty taon̈o 33 tamy zen̈y, folo andra nanongany Jesosy tandan̈itry tan̈y. Nisy olo baka tamy tany maro navy han̈ano fety ta Jerosalema. Nisy pianatra Jesosy kadiriny 120 koa nivory taminy efitry araiky tan̈abony etazy ta Jerosalema tao. Tampoko tio nisy raha nahalany fan̈ahy nandalo. Nahazo fan̈ahy masin̈y iro pianatra aby io. Nisy feo mare karaha tsiko maresaka tao, ndreky nisy raha karaha lelany motro tan̈abony lohany pianatra tsiaraikiaraiky. Nanjary nahay volan̈a maro iro.

Ren̈inolo navy ta Jerosalema tao feo io, ke navy malaky iro hizaha raha nandalo io. Gaga mare iro naharen̈y pianatra aby io nahay volan̈andro. Iro nivolan̈a: ‘Iro olo aby io ma tsy olo baka Galilia? Karakory nahaizandro volan̈antsika?’

Nitsangana talohandro tio Petera ndreky apostoly sasany. Nikoran̈iny Petera tamindro fomba namonoan̈a Jesosy, ndreky izy nivilominy Jehovah. Ho Petera: ‘Efa andan̈itry an̈y Jesosy izioty,  ankavanan̈a Zan̈ahary. Izy nandatsaka fan̈ahy masin̈y io, eraka raha nivolan̈iny. Zen̈y mahavy raha hitanaro ndreky ren̈inaro io.’

Tianolo mare volan̈a Petera zen̈y, ke ho iro: “Ino raha tokony hataonay?” Hoizy tamindro: ‘Mila mibebaka anaro, ke hatao batisa aminy an̈arany Jesosy. Hahazo fan̈ahy masin̈y koa anaro.’ Nisy olo kadiriny 3 000 natao batisa taminio. Nanjary naro pianatra ta Jerosalema tao tafaranizen̈y. Nahazo fan̈ahy masin̈y iro apostoly aby io, ke nahavita nan̈ampy pianatra aby io hanjary fiangonan̈a, ndreky nampianatra iro raha nivolan̈iny Jesosy.