Tsʼoʼok u máan 10 kʼiinoʼob desde ka suunaj Jesús teʼ kaʼanoʼ. Le disipuloʼoboʼ tu kʼaʼamoʼob le kiliʼich muukʼoʼ. Táan kaʼach u kʼiinbesaʼal le Pentecostés tu añoil 33, le oʼolal yaʼab máakoʼob tiʼ jejeláas kaajoʼobeʼ taaljaʼanoʼob u kʼiinbesoʼob. Kex 120 u disipuloʼob Jesuseʼ u muchʼmubaʼob kaʼach tiʼ junpʼéel cuarto yaan tu kaʼanlil junpʼéel naj. Chéen ka tu yiloʼob u yúuchul junpʼéel baʼal beet u jaʼakʼal u yóoloʼob. Yóokʼol u pool cada juntúuleʼ chíikpaj mejen kʼáakʼoʼob beet u tʼaanoʼob ich jejeláas idiomaʼob. Tsoʼoleʼ uʼuyaʼab xan u juum junpʼéel kʼaʼamkach iikʼ ichil tuláakal le najoʼ.

Le máakoʼob bijaʼanoʼob Jerusalenoʼ tu yuʼuboʼob le juumoʼ ka binoʼob áalkabil u yiloʼob baʼax ku yúuchul. Jach jaʼakʼ u yóoloʼob ka tu yuʼuboʼob táan u tʼaan le disipuloʼob ich jejeláas idiomaʼoboʼ. Tu yaʼaloʼob: ‹Wa galileail le máakoʼobaʼ, ¿bix túun u tʼaanoʼob ichil le tʼaan k-beetkoʼ?›.

Pedro yéetel le uláakʼ apostoloʼoboʼ waʼalajoʼob tu táan le yaʼab máakoʼoboʼ. Pedroeʼ tu yaʼalajtiʼob: ‹Teʼexeʼ ta kíimseʼex Jesús, chéen baʼaleʼ Jéeobaeʼ tu kaʼa kuxkíintaj. Beoraaʼ letiʼeʼ tiaʼan teʼ kaʼan tu x-noʼoj  kʼab Diosoʼ, yéetel tsʼoʼok u tsʼáaiktoʼon le kiliʼich muukʼ u yaʼalmajtoʼonoʼ. Le oʼolal tsʼoʼok a wilkeʼex yéetel a wuʼuyikeʼex le milagroʼobaʼ›.

Le yaʼab máakoʼoboʼ péeknaj u yóoloʼob. Le baʼax tu yaʼalaj Pedrooʼ kʼuch tu puksiʼikʼaloʼob, le oʼolal tu kʼáatoʼobtiʼ: ‹¿Baʼax kʼaʼabéet k-beetik?›. Pedro túuneʼ tu núukajtiʼob: ‹Kʼex a tuukuleʼex yéetel okjaʼaneneʼex tu kʼaabaʼ Jesucristo. Beyoʼ yaan a kʼamkeʼex le kiliʼich muukʼ ku síik Diosoʼ›. Teʼ kʼiin jeʼeloʼ kex 3,000 máakoʼob okjaʼanajoʼob. Desde teʼ súutukoʼ káaj u maas yaʼabtal le disipuloʼob Jerusalenoʼ. Yéetel u yáantaj le kiliʼich muukʼoʼ, le apostoloʼoboʼ tu káajsoʼob yaʼab múuchʼuliloʼob. Beyoʼ béeychaj u kaʼanskoʼob tiʼ le disipuloʼob tuláakal le baʼax aʼalaʼantiʼob tumen Jesusoʼ.