Maʼ gudiʼdiʼ biaʼ chii gubidxa de bibiguetaʼ Jesús guibáʼ. Gucuaa ca discípulo stibe espíritu santu. Cayaca Saa stiʼ Pentecostés stiʼ iza 33, ne binni de stale guidxi guyé ndaaniʼ guidxi Jerusalén para guni celebrarcaʼ saa que. Biaʼ ti gayuaa gande discípulo stiʼ Jesús guca reunircaʼ lu guiropa pisu stiʼ ti yoo, málasi guca xiixa ni qué huayuu dxi gaca. Bihuinni xiixa ni ruluíʼ ti bele galaa ique cada tobi de ca discípulo que, ne bizulú guníʼcabe gadxé gadxé idioma. Laaca guxidxi ti bi nadipaʼ ndaaniʼ yoo que.

Ora binadiaga ca binni ni zeeda de sti ladu ridxi que la? biree guxooñecaʼ zecaʼ ziguuyacaʼ xi guca. Guizáʼ bidxagayaacaʼ ora binadiágacaʼ caníʼ ca discípulo que gadxé gadxé idioma. Óraque guniʼcaʼ: «Ca binni riʼ la? de Galilea laacaʼ, ¿ximodo ndiʼ caníʼcabe idioma stinu pue?».

Óraque bizuhuaa Pedro ne ca xcaadxi apóstol nezalú guiráʼ ca binni que. Para gudxi Pedro laacabe: «Laatu biititu Jesús, peru maʼ bisibani Jiobá laabe. Yanna maʼ nuube guibáʼ, ladu derechu stiʼ Dios.  Ne maʼ bidiibe laadu espíritu santu ni guniʼbe chigudiibe laadu. Nga runi, maʼ biiyatu ne maʼ binadiágatu ca milagru riʼ».

Guizáʼ bidxagayaa ca binni que. Ca diidxaʼ guníʼ Pedro que yendá cani ndaaniʼ ladxidóʼcabe, ngue runi gunabadiidxacabe: «¿Xi caquiiñeʼ gúnidu yaʼ?». Laabe bicábibe laacaʼ: «Lagaca arrepentir de ca pecadu stitu ne lachuunisa lu lá Jesús. Pa gúnitu ni, laaca zacaatu espíritu santu». Dxi que, guyuunisa biaʼ chonna mil binni. Dede dxi que, bizulú guyuu stale discípulo ndaaniʼ guidxi Jerusalén. Gucané espíritu santu ca apóstol que para guyuu jma congregación. Zaqué gunda bisiidicabe ca discípulo guiráʼ ca cosa ni biʼniʼ mandar Jesús laacabe gúnicabe.