Ng’atu moko ma wotho ngo ubed ubedo pi nikwayu piny i dhugola mir hekalu. Reto moko kumeni, eneno Petro giku Yohana gibecidho i hekalu. Ekwayugi kumae: ‘Wukemii ira piny moko do?’ Petro udwoko ire kumae: ‘Gin m’abecimio iri tie ber nisagu sente. I nying’ Yesu, ai malu iwothi!’ E Petro umaku cing’e kara eai malu, e ng’atune ucaku wotho! Anyong’a ma yawe mbe unego udul dhanu ni kum udu maeno, uketho dhanu dupa udoko juyic.

Ento kwinyo ulund umaku julam ku Jusadukayo. Uketho gimaku jukwenda man giterogi i wang’ pido, e gipenjogi kumae: ‘Ng’a m’umio iwu copo mi keyo kum ng’atuni?’ Petro udwoko igi kumae: ‘Wanwang’u copo i bang’ Yesu Kristu ma wunego.’ Judong dini ukok i wigi kumae: ‘Wuwek niweco iwi nying’ Yesu!’ Ento jukwenda udwoko kumae: ‘Wabimedara mwa niweco pire. Wabiling’ ungo.’

Kinde ma giweko Petro giku Yohana ci, gicidho ndhundhu i bang’ julub mange man gikoro igi lembe m’utimere. E gigam girwo karacelo, gipenjo Yehova kumae: ‘Ka copere mii iwa tegocwiny kara wamedara nitimo tic peri.’ Yehova umio igi tipo pare maleng’, uketho gimediri nirweyo man nikeyo kum. E dhanu ma dupa udoko juyic. Ento Jusadukayo ubino ku kumira ma lee uketho gitwio jukwenda man gibologi i kol. Re ku diewor nica, Yehova uoro malaika ubin ugonyo dhugola kol man eyero ni jukwenda kumae: ‘Wucidh i hekalu man wuponj kuca.’

Urwonde pir kugweno, jucidh juyero ni Sanedrini, niwacu odpido ma malu mi Juyahudi kumae: ‘Dhugola kol utie atwia, re dhanu ma wutwio ca, giwok! Gini i hekalu, gibeponjo migi dhanu!’ E jucidh jumaku jukwenda kendo man juterogi i wang’ Sanedrini. Jalam ma dit uyero igi kumae: ‘Wang’olo iwu ya kud wuwec iwi nying’  Yesu!’ Ento Petro udwoko igi kumae: “Wakoworo Mungu be ma sagu woro dhanu.”

Judong dini gibino ku kwinyo ma lee dit uketho gimito gineg jukwenda cen. Ento Jafarisayo moko ma nyinge Gamaliel uai malu man ewacu kumae: ‘Wubed ku weng’wu, saa moko nyo Mungu tie ku dhanu maeni. Wubemito andha wukied i dhu Mungu?’ E gigam giwinjo juk pare. Pieno, i ng’ei ma gifodo jukwenda ku del, ging’olo igi kendo nia kud gimediri ku rweyo, e giwekogi gicidho. Ento lembuno de ucero ngo jukwenda. Gimediri asu ku rweyo lembanyong’a ku tegocwinygi i hekalu man bende ot kubang’ ot.