Mä cojo jaqew templo punkun qontʼasisajj sapüru limosna mayjasïna. Mä jaypʼojja Pedrompi Juanampiruw templor puriskiri uñjäna, ukatwa akham säna: ‘Mirä amp suma, kunaksay wajjtʼapjjeta’ sasa. Pedrosti sarakïnwa: ‘Qollqet sipansa jukʼamp valoranïki ukwa churäma. Jesusan sutipjjaruw nayajj sissma: ¡Sartam, sarnaqarakim!’ sasa. Ukatjja sartañwa yanaptʼäna, cheqapuniw sarnaqjjäna. Jaqenakajj uka milagro uñjasajj wal kusisipjjäna, waljaniw creyentëjjapjjarakïna.

Ukampis sacerdotenakasa saduceonakasa wal colerasipjjäna. Ukatwa apostolonakar katuntasajj Sanedrinar apapjjäna. Ukanjja akham jisktʼapjjäna: ‘Aka jaqer qollañatakejj ¿khitis chʼamsa autoridadsa churapjjtamjja?’ sasa. Pedrosti sarakïnwa: ‘Khitirutï jumanakajj jiwayapkta uka Jesusaw churapjjetu’ sasa. Religión pʼeqtʼirinakajja ‘¡jan Jesusat parlapjjamti!’ sasaw toqenoqapjjäna. Apostolonakajj akham sapjjänwa: ‘Jupjjat parlañajj wakisiwa. Janiw amuktʼapkiristti’ sasa.

Pedrompir Juanampir khitanukjjapjjäna ukhajja, jankʼakiw jupanakajj mayni discipulonakar kunatï paskäna ukanak yatiyapjjäna. Taqeniw Jehová Diosar akham orasipjjäna: ‘Mirä amp suma, jumjjat parlaskakiñatakejj jan ajjsarirïñatak yanaptʼapjjeta’ sasa. Diosajj espíritu santo churäna, ukhamatwa predicasipkakïna, usutanakarus qollasipkakïna. Jukʼat jukʼatjja waljaniw creyentëjjapjjäna. Saduceonakajj envidiasiñatwa apostolonakarojj carcelar llawintapjjäna. Ukampis uka arumajj Jehová Diosaw mä angelap khitäna. Uka angelajj carcelan punkupwa jistʼaräna, apostolonakarojj akham sarakïnwa: ‘Templor kuttʼapjjam, ukan predicapjjarakim’ sasa.

Qhepür alwajj akham sasaw Sanedrinankirinakar yatiyapjjäna: ‘¡Carcelajj suma llawintatäkchisa uka jaqenakajj janiw ukankjjapjjeti! ¡Templonwa predicasipki!’ sasa. Ukatwa apostolonakar mayamp katuntasajj Sanedrinar  apapjjäna. Jachʼa jilïr sacerdotejj akham sänwa: ‘¡Janipuniw Jesusjjat parlapjjätati sapjjaraksmasä!’ sasa. Pedrosti sarakïnwa: “Jaqenakar istʼañat sipansa Diosar istʼapjjañajawa” sasa.

Religión pʼeqtʼirinakajj walpun colerasipjjäna, apostolonakar jiwayañwa munapjjarakïna. Ukampis Gamaliel sat mä fariseow saytʼasisajj akham säna: ‘Amuyumpi kuns lurapjjam. Inas Diosajj aka jaqenakampïskchi, ¿cheqapunit Dios contra nuwasiñ munapjjta?’ sasa. Uk istʼasaw apostolonakar khitanukjjapjjäna. Ukampis nayraqatajj jawqʼjapjjänwa, jan predicapjjañapatakiw ewjjsupjjarakïna. Apostolonakasti predicasipkakïnwa, janipuniw kunas jupanakar jarkʼkänti. Jan ajjsartʼasaw templonsa utat uta sarasas predicasipkakïna.