Ҝәзә билмәјән бир адам мәбәдин гапысынын гаршысында отуруб диләнир. Бир дәфә ҝүнорта вахты о, Бутрусун вә Јәһјанын мәбәдә ҝирдијини ҝөрүр. Онлара дејир: «Нә олар, мәнә нәсә верин». Бутрус дејир: «Мән сәнә пулдан даһа јахшы бир шеј верәҹәјәм. Исанын ады наминә ајаға галх вә ҝәз!» Сонра Бутрус она ајаға галхмаға көмәк едир вә о јеримәјә башлајыр! Ҹамаат бу мөҹүзәни ҝөрәндә һејрәтләнир. Даһа чох инсан имана ҝәлир.

Анҹаг каһинләр вә саддукиләр буна гәзәбләнирләр. Онлар һәвариләри тутуб мәһкәмәјә ҝәтирирләр вә сорушурлар: «О адамы сағалтмаг үчүн ҝүҹү сизә ким вериб?» Бутрус ҹаваб верир: «Биз бу ҝүҹү сизин өлдүрдүјүнүз Иса Мәсиһдән алмышыг». Дин рәһбәрләри гышгырырлар: «Бир даһа Иса һагда данышмајын!» Анҹаг һәвариләр дејирләр: «Биз онун һагда данышмалыјыг. Биз сусан дејилик».

Бутрусла Јәһја һәбсдән азад олан кими диҝәр шаҝирдләрин јанына ҝедиб башларына ҝәләнләри онлара данышырлар. Онлар бир јердә дуа едиб Јеһовадан хаһиш едирләр: «Нә олар, ишини ҝөрә билмәк үчүн бизә ҹәсарәт вер». Јеһова онлара мүгәддәс руһуну верир вә онлар тәблиғ етмәјә, хәстәләри сағалтмаға давам едирләр. Ҝетдикҹә һәвариләрин данышдыгларына иман ҝәтирәнләрин сајы артыр. Саддукиләр пахыллыгларындан һәвариләри тутуб зиндана салырлар. Анҹаг ҝеҹә вахты Јеһова мәләјини ҝөндәрир. Мәләк зинданын гапыларыны ачыб һәвариләрә дејир: «Мәбәдә ҝери гајыдын, орада тәлим верин».

Нөвбәти ҝүн сәһәр дин башчыларынын мәһкәмәси олан Синедрионда хәбәр верилир: «Зиндан һәлә дә бағлыдыр, анҹаг тутдуғунуз инсанлар гачыблар! Онлар мәбәддә инсанлара тәлим верирләр!» Һәвариләри јенидән тутуб Синедриона ҝәтирирләр. Баш каһин дејир: «Сизә әмр  етмишдик ки, Иса һагда данышмајасыныз!» Анҹаг Бутрус ҹаваб верир: «Биз инсанлара јох, һөкмдарымыз Аллаһа итаәт етмәлијик».

Дин рәһбәрләри о гәдәр гәзәбләнирләр ки, һәвариләри өлдүрмәк истәјирләр. Анҹаг Гәмлаил адлы бир фәриси ајаға галхыб дејир: «Јахшы-јахшы дүшүнүн! Бәлкә, Аллаһ бу инсанларладыр. Доғруданмы, Аллаһла далашмаг истәјирсиниз?» Онлар онун мәсләһәтинә гулаг асырлар. Һәвариләри дәјәнәклә дөјәндән сонра онлара тәблиғ етмәмәји бир даһа әмр едирләр. Даһа сонра исә онлары азад бурахырлар. Анҹаг бу, һәвариләри дајандырмыр. Онлар мәбәддә вә ев-ев хош хәбәри ҹәсарәтлә тәблиғ етмәјә давам едирләр.