Bian kun m’ɔ kwlá nantiman’n, ɔ tran Ɲanmiɛn i sua’n i anuan’n i ɲrun lɛ, ɔ srɛsrɛ like. Cɛn kun nnɔsua’n, ɔ wunnin Piɛli nin Zan, be su wlu Ɲanmiɛn i sua’n nun lɔ. Ɔ seli be kɛ: ‘Amun yaci, amun man min like kan.’ Piɛli seli i kɛ: ‘Like nga n waan ń fá mán wɔ’n, i kpa tra sika. Zezi dunman nun’n, jaso nanti!’ Piɛli ukɛli i naan w’a jaso, kpɛkun ɔ nantili. Sa sɔ’n boli sran mun be nuan. Ɔ maan sran kpanngban be kacili Zezi i sɔnnzɔnfuɛ.

Sanngɛ Ɲanmiɛn ɲrun jranfuɛ mun nin Sadisefuɛ mun be fali ya. Be trali akoto mun be ɔli jɔlɛ difuɛ mun be ja su. Jɔlɛ difuɛ mun be usali be kɛ: ‘?Wan dunman nun yɛ amun yoli bian nga i juejue-ɔ?’ Piɛli tɛli su kɛ: ‘Zezi mɔ amun kunnin i’n i dunman nun-ɔn.’ Be kpannin akoto mun be su. Be seli be kɛ: ‘Amun yaci Zezi i ndɛ kanlɛ!’ Sanngɛ akoto mun be tɛli be su kɛ: ‘Ɔ fata kɛ e kɛn i ndɛ. E su yacimɛn i ndɛ kanlɛ.’

Kɛ be yacili Piɛli nin Zan be nun cɛ’n, be ɔli Zezi i sɔnnzɔnfuɛ onga mun be wun lɔ, be ko kannin sa sɔ’n i ndɛ kleli be. Be srɛli Zoova likawlɛ. Be seli i kɛ: ‘Yaci, uka e naan e ɲan wunmiɛn e di ɔ junman’n titi.’ Zoova fɛli i wawɛ’n mannin be. Ɔ maan be boli jasin fɛ’n titi, yɛ be yoli sran mun be juejue. Kɛ ɔ yoli sɔ’n, sran kpanngban be wa kacili Zezi i sɔnnzɔnfuɛ. Sadisefuɛ mun be ɲin cili akoto mun. I sɔ’n ti’n be trali be, kpɛkun be wlali be bisua. Sanngɛ kɔnguɛ’n, Zoova sunmɛnnin i anzi kun. Ɔ wa tikeli bisua’n i anuan mun, kpɛkun ɔ seli akoto mun be kɛ: ‘Amun wɔ Ɲanmiɛn i sua’n nun lɔ naan amun ko kle sran mun be like.’

Kɛ lika cɛnnin’n, sran mun be ko seli Zuifu mun be Jɔlɛ difuɛ dandan mun be kɛ: ‘Bisua’n i anuan mun be nun ti towa, sanngɛ sran nga amun trali be’n b’a fite. Be o Ɲanmiɛn i sua’n nun lɔ, be su kle sran mun be like.’ Be ko trali akoto mun ekun, be fa be ɔli Zuifu mun be Jɔlɛ difuɛ dandan mun be ja su. Ɲanmiɛn ɲrun jranfuɛ dan’n seli akoto mun be kɛ: ‘?Y’a seman amun kɛ nán amun kan Zezi i ndɛ kun?’ Piɛli tɛli i su kɛ: “Ɲanmiɛn m’ɔ ti e siefuɛ’n yɛ ɔ fata kɛ e ɲin yi i-ɔ, nán klɔ sran mun-ɔn.”

Zuifu mun be kpɛnngbɛn mun be fali ya kpa. I sɔ’n ti’n, be waan bé kún akoto mun. Sanngɛ Farizifuɛ kun mɔ be flɛ i Gamaliɛli’n, ɔ jasoli. Kpɛkun ɔ seli be kɛ: ‘Amun nian amun wun kpa! Atrɛkpa’n, Ɲanmiɛn o be sin. ?Amun kunndɛ kɛ amun nin Ɲanmiɛn bé kún?’ Be fali bian’n i ndɛ’n su. Sanngɛ be boli akoto mun nin ngble. Be seli be ekun kɛ be yaci jasin’n i bolɛ, kpɛkun be yacili be nun. Akoto mun b’a yaciman jasin bolɛ. Be kannin Ɲanmiɛn ndɛ’n juejue su titi Ɲanmiɛn i sua’n nun, ɔ nin awloawlo mun be nun.