Ro ras-ras kam snon ḇemanis oso kyain ro kedwa ḇeba ro bait ma dararor. Snon ine jadi fa imbran ḇa. Ras oso myam Petrus ma Yohanes susun ḇe bait. Dor pipi ro su. Ḇape Petrus ikofen, ’Yasmai pipi ḇa imboi nari yaḇuk roi ḇepyum syadi ḇe au. Kuker snonsnon Yesus, wores ma wambrane!’ Ramnai Petrus ikfin pyan i fa dores, ma imbran ḇeri! Snonkaku simarisen kaku smam mujisat anine ma ḇebor sya sikyar faro Yesus i.

Ḇape imam ma snonkaku Saduki sya simsor kaku. Sfor ma sun manfamyan ansine ḇe moḇ semankara si roro ya. Sifuken si, ’Mansei ḇeḇuk papoik ḇe mko fa mkoḇuk pararei ḇe snon ani?’ Petrus kyarem bo doḇe, ’Nkosmai papoik ro Yesus Kristus, snon mkomun kwar ani.’ Mura manfarkin agama ansine siyuw si ma sikofen, ’Mkawos ker awer Yesus i ro moḇ ine!’ Ḇape manfamyan soḇe, ’Nari nkawos snonsnon ḇyedi pdef. Nari nkopok fa nkomnai ḇa.’

Fyor Petrus ma Yohanes susasyar ro bui kwar, sura susrow kuker manfamyan ḇesesya ma sufawar rosai ḇeḇejadi ya. Inja sikam senadi ḇe Yahwe I, soḇe, ’Wafnoḇek inko fa nkomkak ḇa insama nkombran pdef fararur ine.’ Yahwe ḇyuk rur ḇesren Ḇyedi, inja sḇaryas ankankinem ḇeḇye ine ma sḇuk pararei ḇe snonkaku sya. Snonkaku sibor syadi wer sikyar ḇe Yesus i. Snonkaku Saduki sya simarisen ḇa kaku faro manfamyan sine, inja sisun si ro bui. Ḇape ro roḇ ani, Yahwe iwan malaikat oso ḇe sko. Malaikat ani syeḇen kedwai ḇero bui ani ma ikofen, ’Mkoramura ḇe bait wer ma mkoḇuk farkarkor ro diwa.’

Ro arwo ya, ono sisya sikofenḇair ḇe Sanhedrin, ’Bui ani syopder kaker, ḇape snonkaku mkofor ansi sisya ḇa! Kirine sfarkor snonkaku sya ro bait!’ Inja sfor  manfamyan ansine wer ma sun si ḇe Sanhedrin. Imam ḇeba oso ikofen ḇe si, ’Nkokofen kwar ḇe mko ḇae, mkawos ker awer Yesus i ro mob ine!’ Ḇape Petrus kyarem ḇo doḇo ”Inkoso syadi faro Allah [ḇe manḇepoik nkoḇedi] ro inkoso snonkaku.”

Manfarkin agama ansine simsor kaku, inja imbe smun manfamyan ansya. Ḇape, snonkaku Farisi oso ḇenir ḇe Gamaliel ikofen ḇe si, ’Mkosasor mko! Imbude Allah isya ryous si. Imbe mkawos pum Allah I ke?’ Mura srower wos ḇyena. Siprer manfamyan ansine ramnai, sidwarek wer si fa sḇaryas ankankinem ḇeḇye ine. Ramnai, siwan si fa sibur, ḇape sipok simnai fa sḇaryas ankankinem ḇeḇye ine ḇa. Sḇaryas pdef ro bait ma ro rum ḇe rum kuker makak ḇa.