Mbômbô’ô éziñ ô mbe ô tabe’e anyiine ya temple môs ôse, ô ja’é bôte moné. Ngô’é éziñ, a nga yene Pierre ba Jean be kele nyiine temple. Ane a nga jô be na: ‘Éngôngo, va’ané ma jôm éziñ.’ Nde Pierre a nga jô nye na: ‘Me ne ve wo jôm é ne édima a lôte moné. A jôé Yésus Krist, ma jô wo na, kôlô’ô si, ô wuluu!’ Ane Pierre a nga bete nye, nde a nga taté na a wulu! Nsamba bôt ô mbe valé ô mbe fe’e ne vema, a abui ya été e nga buni.

Ve beprêtre a besadducéen be nga wô’ô jam ete ôlun. Ane be nga bi minlôman, be kele mie nda mejô, a sili mie na: ‘Za a nga ve mia ngule ya saé môte nyi?’ Pierre a nga jô na: ‘Yésus Krist mi nga wôé, nnye a te ve bia ngul éte.’ Ane betebe ôsu ya menda me Zambe be nga bam, a jô na: ‘Te mia ve’ele beta kobô ajô Yésus!’ Ve minlôman mi nga jô na: ‘Momo, bia yiane kobô ajô dé. Bia ye ke dibe menyu mangan.’

Môs ôbien be nga suu Pierre ba Jean, be nga ke koone beyé’é bevok, a kate be mam me nga kui be. Ane be nga ye’elan nsamba, be sili’i Yéhôva na: ‘Éngôngo, volô’ô bia na bi bo ayo’o nlem, asu na bi ke ôsu a bo wo ésaé.’ Yéhôva a nga ve be mbamba nsisim, nalé a nga volô be na be ke ôsu a kañete, a saé bôt. Ane abui bôt e nga buni. Besadducéen ve zu bo be éviele aval é mbe na, be nga bi bi minlôman a futi mie mimbôk. Ve alu ete ebien, Yéhôva a nga lôme ange na a diine mimbé ya nda mimbôk, a jô fe minlômane na: ‘Kelané temple, mi ke ye’ele wôé.’

Tyé é nga tôé valé, bôte ya Sanhedrin a betebe ôsu ya menda me Zambe be nga sili na: ‘Nga mimbé mi mbe mimfetan, ve éyoñe ji, bôte mi nga bi be nto nseñ! Be ne temple été awolô bia kobo di, be ye’ele  bôt!’ Nde be nga beta bi minlôman, a kee mie e Sanhedrin. Ane beta prêtre a nga jô na: ‘Nga bi nga ve mia atiñe na mi bo te beta kobô ajô Yésus!’ Ve Pierre a nga jô nye na: “A Zambe a bôt, bia yiane dañe wô’ô Zambe.”

Betebe ôsu ya miñyebe be nga wô’ô ôlun aval é mbe na, be mbe be nga kômbô wôé minlôman. Ve mone Pharisien éziñ a mbe jôé na Gamaliel, a nga jô be na: ‘Taba’ane ntyel! Me lô na Zambe a ne a bôte ba. Ye mia kômbô sengane Zambe?’ Ane be nga vô’ôlô melebe mé. Mvuse ya valé, be nga yite minlôman a minkasa, be jô fe mie na mi télé ésaé nkañete, ane be nga suu mie. Ve minlôman mi nji telé ésaé nkañete. Be nga ke ôsu a kañete mbamba foé a ayôñ ése e temple été, a menda menda.