Dihay bakol nga nagpakilimos didto sa pultahan sa templo kada adlaw. Usa ka hapon niana, nakita niya si Pedro ug Juan nga nagpadulong sa templo ug miingon siya: ‘Basig naa moy ikahatag.’ Si Pedro miingon: ‘May ihatag ko nimo nga labaw pa kay sa kuwarta. Sa ngalan ni Jesus, tindog ug lakaw!’ Dayon gitabangan siya ni Pedro sa pagtindog, ug nakalakaw siya! Puwerteng lipaya sa mga tawo pagkakita nila sa milagro maong daghan pa ang nahimong magtutuo.

Nasuko ang mga saserdote ug mga Saduseo. Ilang gidakop ang mga apostoles ug gidala sa Sanhedrin, nga maoy korte sa mga lider sa relihiyon. Dayon gipangutana sila: ‘Kinsay naghatag ninyog gahom sa pag-ayo niining tawhana?’ Si Pedro mitubag: ‘Si Jesu-Kristo nga inyong gipatay.’ Ang mga lider sa relihiyon misingka: ‘Ayaw na mo paghisgot kang Jesus!’ Pero ang mga apostoles miingon: ‘Kinahanglan ming mosulti bahin niya. Dili mi mohunong.’

Dihang gibuhian na si Pedro ug Juan, miadto dayon sila sa ubang tinun-an ug giestorya ang nahitabo. Nag-ampo sila kang Jehova: ‘Palihog, tabangi mi nga dili mahadlok aron padayon namong mahimo ang imong gisugo.’ Gitagaan sila ni Jehova ug balaang espiritu, ug nagpadayon sila sa pagsangyaw ug pagpang-ayo. Midaghan pa ang nahimong tinun-an. Naglagot ang mga Saduseo. Ilang gidakop ug gipriso ang mga apostoles. Pero pagkagabii, nagpadala si Jehova ug anghel nga nag-abli sa pultahan sa prisohan ug giingnan ang mga apostoles: ‘Balik mo sa templo. Panudlo mo didto.’

Pagkabuntag, ang Sanhedrin nakabalita: ‘Sirado ang prisohan, pero wala na ang mga tawo nga inyong gidakop! Tua na sila sa templo ug gitudloan nila ang mga tawo!’ Gidakop na pod nila ang mga apostoles ug gidala sa Sanhedrin. Ang hataas nga saserdote miingon: ‘Giingnan na mo nga mohunong sa paghisgot  kang Jesus!’ Pero si Pedro mitubag: “Kinahanglang sundon namo ang Diyos ingong magmamando imbes ang mga tawo.”

Nasuko pag-ayo ang mga lider sa relihiyon ug gusto nilang patyon ang mga apostoles. Pero ang Pariseo nga si Gamaliel mibarog ug miingon: ‘Pagbantay mo! Basig gitabangan tuod sila sa Diyos. Mahimo na hinuon mong kaaway sa Diyos.’ Mipatuo sila sa iyang tambag. Human nila bunali ang mga apostoles, ila na pod silang gipasidan-an nga mohunong sa pagsangyaw, ug dayon gipalakaw. Pero wala gihapon mohunong ang mga apostoles. Padayon nilang gisangyaw ang maayong balita, didto sa templo ug sa mga balay.