Cɛɛ dɔ tun tɛ se ka tagama ani a tun be to ka sigi Alabatosoba daa la ka dari kɛ. Loon dɔ wulafɛ, a ye Piyɛri ni Zan ye u be donna Alabatosoba kɔnɔ. A y’a fɔ u ye ko: ‘ A’ ye sabari ka fɛɛn dɔ di n’ ma.’ Piyɛri y’a fɔ a ye ko: ‘Fɛɛn dɔ be n’ fɛ min ka fisa ni wari ye, n’ bena o d’i ma. Yezu tɔgɔ barika la ne b’a fɔ i ye, wuli ka tagama!’ O kɔ, Piyɛri y’a dɛmɛ ka wuli ani cɛɛ y’a daminɛ ka tagama. O koo ye jama kabakoya fɔɔ mɔgɔ caaman wɛrɛw kɛra Yezu ka kalandenw ye.

Nka sarakalasebagaw ni Saduseɲɛw dimina kosɔbɛ. U ye cidenw sama ka taga n’u ye kititigɛlaw jɛnkulu ɲɛfɛ. U y’u ɲininga ko: ‘Jɔn lo ye sebagaya di aw ma ani aw sera ka cɛɛ nin kɛnɛya.’ Piyɛri y’u jaabi ko: ‘Aw tun ye Yezu Krista min faga, ale lo ye sebagaya di an ma.’ Diinan kuntigiw kulera cidenw kan ko: ‘Aw kana kuma Yezu koo la tugun!’ Nka cidenw y’a fɔ ko: ‘An ka kan ka kuma Yezu koo la, an tɛna a dabila.’

U ye Piyɛri ni Zan to yen dɔrɔn, u sinna ka taga kalanden tɔɔw fɛ k’o koo lakali u ye. U ye Jehova deli ɲɔgɔn fɛ ko: ‘Sabari, jagwɛlɛya di an ma walisa an ka to k’i ka baara kɛ.’ Jehova ye hakili senu di u ma, u tora ka waajuli kɛ ani ka mɔgɔw kɛnɛya. Mɔgɔ caaman wɛrɛw kɛra kerecɛnw ye. Yezu ka kalandenw ɲangoya tun be Saduseɲɛw la. O kama, u ye cidenw minɛ k’u don kaso la. Nka sufɛ, Jehova ye mɛlɛkɛ dɔ ci ka kasobon daaw yɛlɛ ani k’a fɔ cidenw ye ko: ‘ A’ ye taga Alabatosoba kɔnɔ ka mɔgɔw kalan yen.’

O loon dugusagwɛ, kasobon kɔrɔsibagaw y’a fɔ kititigɛlaw jɛnkulu ye ko: ‘Kasobon daaw tugunin lo, nka aw tun ye mɔgɔ minw don yen olu tɛ yen tugun!’ Dɔ y’a fɔ fana ko: ‘U be mɔgɔw kalanna Alabatoso kɔnɔ!’  U ye cidenw minɛ tugun ka taga n’u ye kititigɛlaw jɛnkulu fɛ. Sarakalasebagaw kuntigiba y’a fɔ cidenw ye ko: ‘An tun m’a fɔ aw ye ka gwɛ ko aw kana mɔgɔw kalan Yezu koo la wa?’ Nka Piyɛri y’a jaabi ko: “Anw te se ka ban Ala sago la ka adamadenw ta kɛ.”

Diinan kuntigiw dimina fɔɔ u tun b’a fɛ ka cidenw faga. Nka, Fariziɲɛcɛ min tɔgɔ ko Gamaliyɛli, ale wulila ani k’a fɔ ko: ‘Aw ye aw yɛrɛ kɔlɔsi dɛ! A be se ka kɛ ko Ala be ni cɛɛ nunu ye. Aw b’a fɛ ka Ala kɛlɛ wa?’ U sɔnna Gamaliyɛli ka ladili ma ani u ye cidenw to yen u tagara. Nka u y’u bugɔ fɔlɔ ni berew ye ani k’a fɔ u ye k’u kana waajuli kɛ tugun. Nka, o ma cidenw fari faga. U tora k’u jaa gwɛlɛya ka kibaro diiman fɔ mɔgɔw ye Alabatoso kɔnɔ ani soo ni soow la.