Eejachi wanee wayuu masaʼasai, aikalaʼawaishi nia waneepia soʼuluʼu tü piichi aʼwaajüleekat Maleiwa sünain ojulijaa nneerü. Soʼu wanee kaʼi, niʼrüin Pedro nümaa Juan nantapaain suluʼumüin tü piichi aʼwaajüleekat Maleiwa. «Kaaliin maa taya, jüsülaja nneerü tamüin», nümaka namüin. «Taapeerü pümüin wanee kasa anaka maʼin suulialeʼeya nneerü. Tamüshi paala pia saaʼu nünülia Jesuu, püshaʼwalaa, puwaraʼiraa», nümaka Pedro nümüin. Nütameʼeraka nia Pedro, nuwarairaaka joo chi wayuukai. Ponoshootosü saaʼin tü wayuukalüirua tü alatakat, wainma na ekerotokana sünain anoujaa sutuma tü neʼrakat.

Naashichijaaka nooʼomüin na sacerdootekana namaa na saduceokana. Nataʼülaka na aluwataaushiikana sümaa namaain naya suluʼumüin tü kanüliakat Sanedrín. Nasakiraka naya: «¿Jarat kapülainkajatka tü kasa jaaʼinrakat?». «Nia keʼinaajalaka waya Jesuu sünain aaʼinraa kasa makalü aka tüü, chi juʼutitkalinka aaʼin», nümaka Pedro namüin. Namaka joo na laülaashiikana sümaa emetuluin nanüiki namüin: «Wachiaain jia suulia aashajawaa nüchiki Jesuu». Nasoutaka na aluwataaushiikana namüin: «Ayatüinjana waya aashajaain nüchiki Jesuu, nnojoishii waya koʼutüinjanain».

Nüjütünaka achiki Pedro nümaa Juan. Noʼunamaataka eemüin na wane nikirajüinkana Jesuu süpüla naküjüin namüin tü alatakat namüin. Kottapa naya, noʼuraajaka nümüin Jeʼwaa sünain maa: «Pükaaliinja maa waya Jeʼwaa süpüla yalayalain waaʼin sünain aküjaa pütchi püchiki». Naapaka Jeʼwaa chi naaʼinkai namüin süpüla ayatüinjanain naküjain pütchi jee süpüla neiyajüin wayuu eekai ayuulin. Awainmalaashii maʼin na wayuu ekerotokana sünain anoujaa. Süka nachunjain na saduceokana, nataʼülüin sümaa napüreesajirüin na aluwataaushiikana. Soʼu aikat tia, nuluwataain Jeʼwaa wanee aapiee süpüla nujutalüin soʼu tü kaatsetkat. «Juʼuna jüchikuaʼa eemüin tü piichi aʼwaajüleekat Maleiwa jüküjaiwa tü pütchikat yala sümüin wayuu», nümaka chi aapieekai namüin na aluwataaushiikana.

Waneemüin kaʼi, nuʼunaka wanee wayuu sünain aapiraa na chajanakana suluʼu tü kanüliakat Sanedrín. Anuu nünüiki: «Süttüsü süka kaleena soʼu tü kaatsetkat, nnojoliipejeʼe yalain na wayuu jüsürütkana suluʼu. Ichaa naya sünain aküjaa pütchi suluʼu tü piichi aʼwaajüleekat Maleiwa». Nataʼünaka nachikuaʼa na  aluwataaushiikana sümaa namaanüin suluʼumüin tü kanüliakat Sanedrín. «Mataashii wachiaaka jia suulia aashajawaa nüchiki chi Jesuu münakai», nümakalaka joo chi laülaashikai napüleerua na sacerdootekana. Nusoutaka Pedro niʼipajee: «Alanaʼaleesüjaʼa sünain niainjachin woonooin amaa anüiki Maleiwa suulialeʼeya sünüiki wayuu».

Jashichishaatashii na laülaashiikana nooʼomüin na aluwataaushiikana, noʼutee aaʼinchii naya. Nüshaʼwalaaka wanee fariseo kanüliakai Gamaliel sünain maa namüin: «Jalia jia. Eesüjaʼa shiimainre eein chi Maleiwakai namaa wayuukana naainua. ¿Shiimaincheje niʼipoleein jia Maleiwa naaʼujee?». Noonooka sümaa nünüiki. Süpülapünaa najütirüin nachiki, naʼyaajirüin naya süka wunuʼu sümaa nachiaain naya nachikuaʼa süpüla nooʼulaain suulia aküjaa pütchi. Nnojoliipejeʼe eimmolojooin na aluwataaushiikana sutuma tia, ayatüshii naya sünain aküjaa pütchi nüchiki Jesuu chaa suluʼu tü piichi aʼwaajüleekat Maleiwa otta sainküin piichi.