Omurumendu ngwaa ha yenene okukayenda aa haama nokuningira ombatero kovandu eyuva arihe pomahitiro wondjuwo ondjapuke. Eyuva rimwe ometaha eye wa muna Petrus na Johanes amave hiti mondjuwo ondjapuke. Eye wa tja ku wo: ‘Arikaneye ndji peweye otjiṋa.’ Petrus wa tja ku ye: ‘Mbi notjiṋa otjisemba povimariva tji me vanga okukupa. Mena raJesus sekama u kawondje!’ Okuzambo Petrus we mu vatera okuyeruruka nu omurumendu wa uta okukayenda! Otjimbumba tja ri nondjoroka mena rotjihimise tji tja tjitwa hi nga ovengi tji va rira ovakambure.

Posiya ovapristeri nOvasaduke va pindikire. Owo va kambura ovaapostele, ave ve twara kotjombanguriro nave ve pura ave tja: ‘Owaṋi ngwe mu pe omasa wokuverura omurumendu ngwi?’ Petrus wa tja: ‘Twa pewa omasa i Jesus Kristus eṋe ngu mwa zepa.’ Ovanane vozongamburiro va ravaera nave tja: ‘Amu hungire ohunga na Jesus rukwao!’ Posiya ovaapostele va tja: ‘Eṱe katu nakuisa okuhungira ohunga na ye.’

Nu tjimanga Petrus na Johanes tji va kuturwa, owo va ya kovahongewa varwe nave keveraera avihe mbya tjitwa ku wo. Owo va kumba pamwe, nave ningire ku Jehova ave tja: ‘Arikana tu vatera kutja tu rire ozombanḓe kokutja tu yenenise otjiungura tjoye.’ Jehova we ve pa ombepo ye ondjapuke, nowo va kayenda komurungu okuzuvarisa nokuverura ovandu. Ovandu ovengi va rira ovakambure. Ovasaduke va ṱeruru nga tji va kambura ovaapostele nave ve yumbu mondeko. Posiya mokati kouṱuku, Jehova wa hinda omuengeli, ngwa paturura omivero vyondeko na raere ovaapostele a tja: ‘Yarukeye kondjuwo ondjapuke mu kahonge.’

Omuhuka mbwa kongorera ko, Otjira tjOvajuda, novanane vozongamburiro potjombanguriro va raerwa kutja, ‘Ondeko ngunda ya patwa, posiya ovarumendu mba ri ava kamburwa kave mo! Owo ve ri mondjuwo ondjapuke mave hongo ovandu!’ Ovaapostele  va kamburwa rukwao nave etwa kOtjira tjOvajuda. Omupristeri omunene wa tja: ‘Twe mu rakiza kutja amu hungire ohunga na Jesus!’ Posiya Petrus wa zira na tja: “Omundu wa sokukara nonḓuviro ku Ndjambi komeho yokukara nonḓuviro kovandu.”

Ovanane vozongamburiro va pindikire tjinene nga tjaave vanga okuzepa ovaapostele. Posiya Omufarisei wena Gamaliel wa sekama na tja: ‘Ṱakamiseye! Mukuru mape ya u ri pu novarumendu mba. Tjiri mamu vanga okurwa kuna Mukuru?’ Owo va puratena ku ye. Va tona ovaapostele, ave ve rakiza kutja ve ise okuzuvarisa okuzambo ave ve esa kutja ve yende. Posiya ihi katji tjaerere ovaapostele. Owo va kayenda komurungu okuzuvarisa ombuze ombwa nouvanḓe mondjuwo ondjapuke nokuza kondjuwo nondjuwo.