Kwaĩ mũndũ ũmwe waĩ kĩema wekalaa kĩla mũthenya mũvĩanĩ wa ĩkalũ aivoya ũtethyo. Mũthenya ũmwe nĩwoonie Vetelo na Yoana maendete ĩkalũnĩ. Amona ameie atĩĩ: ‘Mwa nengai o kĩndũ.’ Ĩndĩ Vetelo amwĩie: ‘Nĩ na kĩndũ kĩngĩ kya vata kwĩ mbesa ngwenda ũkũnenga. Ĩsyĩtwanĩ ya Yesũ ũkĩla na ũithi.’ Na ĩndĩ Vetelo amũkwata kwʼoko, amũũngamya, na mũndũ ũsu ambĩĩa kũthi. Andũ aingĩ ala maĩ vau nĩmatanie mũno nũndũ wa kyama kĩu, na ũu watuma andũ aingĩ mũno matwʼĩka etĩkĩli.

Ĩndĩ athembi na Asatukai mayaaendeewʼa nĩ ũndũ ũsu, na kwoou mathata. Nĩmakwatie atũmwa, mamatwaa mbee wa Nzama ya Ayuti, na mamakũlya: ‘Nũũ ũla ũmũnengete ũtonyi wa kũvosya mũndũ ũũ?’ Nake Vetelo amasũngĩa: ‘Tũnengetwe ũtonyi ũũ nĩ Yesũ Klĩsto, ũla mũnooaie.’ Ĩndĩ atongoi asu ma ndĩni maneenie na wasya mũnene meea atũmwa atĩĩ: ‘Ekai vyũ kũneena ĩũlũ wa Yesũ.’ Namo atũmwa asu mamasũngĩa mamea: ‘No nginya tũendeee kũneena ĩũlũ wake. Tũieka.’

Ĩtina wa Vetelo na Yoana kũlekwʼa, nĩmaendie ĩmwe kwa ĩmwe vala ve amanyĩwʼa ala angĩ na mamatavya maũndũ onthe ala meethĩiwe. Nĩmavoyie me vamwe na mamwĩa Yeova atĩĩ: ‘Mwa tũtetheesya twĩthĩwe twĩ na ũkũmbaũ nĩ kana tũendeee kũthũkũma wĩa waku.’ Yeova nĩwamanengie veva mũtheu na kwoou maendeea kũtavanyʼa na kũvosya awau. Na andũ aingĩ nĩmaendeeie kũtwʼĩka etĩkĩli. Kĩu kyatumie Asatukai methĩwa na kĩwĩu na kwoou makwata atũmwa na mamekya yela. Ĩndĩ ũtukũ o ũsu, Yeova nĩwatũmie mũlaĩka ũla wavingũangie mĩomo ya yela, na ĩndĩ eea atũmwa atĩĩ: ‘Syokai ĩkalũnĩ na mũiendeea kũmanyĩsya andũ ala me vau.’

Mũthenya ũla waatĩĩe kwakya tene, Nzama ya Ayuti nĩyakwatie ũvoo ũkwasya atĩĩ: ‘Mĩomo ya yela no mĩvinge, ĩndĩ aũme ala mũnakwatie mai vo! Me ĩkalũnĩ maendeee kũmanyĩsya andũ.’ Ĩtina wa ĩvinda ĩnini, atũmwa nĩmakwatiwe ĩngĩ na matwawa mbee wa Nzama ya Ayuti. Me vau mbee wa  nzama ĩsu, mũthembi mũnene ameie atĩĩ: ‘Nĩtũnamwĩaĩe kana mũikatate kũneena ĩngĩ ĩũlũ wa Yesũ.’ Ĩndĩ Vetelo amũsũngĩa atĩĩ: “No nginya tũmwĩwʼe Ngai nũndũ nĩwe mũsumbĩ, vandũ va kũmewʼa andũ.”

Atongoi asu ma ndĩni nĩmathatie mũno nginya menda kũmoaa atũmwa. Ĩndĩ Mũvalisi ũmwe weetawa Kamalieli nĩwaũngamie na asya: ‘Ĩsũvĩei! Ngai nũtonya kwĩthĩwa nowe ũkũtetheesya aũme aa. Inywʼĩ nĩmũkwenda kũmũkita Ngai?’ Atongoi asu nĩmeethukĩĩisye ũndũ ũsu Kamalieli wamatavisye. Ĩtina wa kũkũna atũmwa asu ivoko, nĩmameaĩe ĩngĩ maikasyoke kũtavanyʼa na ĩndĩ mamalekya. Ĩndĩ atũmwa mayaaeka. Vandũ va ũu, maendeeie kũtavanyʼa ũvoo mũseo na ũkũmbaũ, ĩkalũnĩ na nyũmba kwa nyũmba.