Jun li winq li inkʼaʼ nabʼeek nachunlaak wulaj wulaj chi xpatzʼbʼal xlemoox saʼ rokebʼaal li rochoch li Yos. Saʼ jun ewu, kiril naq laj Pedro ut laj Juan yookebʼ chi wulak saʼ li rochoch li Yos ut kixye rehebʼ: «Bʼaanuhomaq usilal, chineetenqʼa». Laj Pedro kixye re: «Li tinkʼe aawe jwal chaabʼil chiru li tumin. Saʼ xkʼabʼaʼ li Jesus, waklin ut bʼeen!». Tojaʼ naq, laj Pedro kixtenqʼa chi wakliik, ut li winq kiʼok chi bʼeek. Kʼajoʼ naq keʼsahoʼk xchʼool ebʼ li poyanam chi rilbʼal li sachbʼachʼoolej aʼin ut naabʼalebʼ keʼok chi paabʼank.

Abʼan ebʼ laj tij ut ebʼ laj Saduseey keʼchalk xjosqʼil. Keʼxchap ebʼ li Apostol, keʼxkʼam saʼ li raqlebʼaal aatin, li naxkʼabʼaʼi Sanedrin, ut keʼxpatzʼ rehebʼ: «Ani xkʼehok eewankil re xbʼanbʼal li winq aʼin?». Laj Pedro kixye rehebʼ: «Li Jesukriist, li winq li xeekamsi». Ebʼ laj kʼamolbʼe saʼ li paabʼal keʼxye chi kaw: «Kanabʼomaq aatinak chirix li Jesus!». Ebʼ li Apostol keʼxye: «Tento tooʼaatinaq chirix. Inkʼaʼ tqakanabʼ xbʼaanunkil».

Tojaʼ naq, keʼrachʼabʼ laj Pedro ut laj Juan, ut xkohebʼ saʼ junpaat chi xyeebʼal rehebʼ li junchʼol chik chi tzolom li kikʼulmank. Chixjunilebʼ saʼ junajil keʼtijok chiru li Jehobʼa: «Bʼaanu usilal, kʼe xkawilal qachʼool re naq inkʼaʼ tqakanabʼ aatinak chaawix». Li Jehobʼa kixkʼe li santil musiqʼej saʼ xbʼeenebʼ, ut chi joʼkan inkʼaʼ keʼxkanabʼ puktesink ut kʼirtasink. Inkʼaʼ nekeʼxkanabʼ tamk choʼq aj paabʼanel. Ebʼ laj Saduseey kʼajoʼ nekeʼkaqalink joʼkan naq keʼxkʼe saʼ tzʼalam ebʼ li Apostol. Abʼan saʼ li qʼoqyink ajwiʼ aʼan, li Jehobʼa kixtaqla jun li anjel chi xtebʼal li tzʼalam ut kixye rehebʼ li Apostol: «Ayuqex wiʼ chik saʼ rochoch li Yos ut aran texpuktesinq».

Naq xsaqewk, jun li winq kiwulak chi xyeebʼal re li Sanedrin: «Li tzʼalam tzʼaptzʼo rikʼin laaw, abʼan ebʼ li winq li xeekʼe saʼ tzʼalam moko wankebʼ ta chik aran! Yookebʼ chi puktesink  saʼ li rochoch li Yos!». Joʼkan naq, keʼxchap wiʼ chik ebʼ li Apostol ut keʼxkʼam rikʼin li Sanedrin. Li xyuwaʼil aj tij kixye: «Ak xqaye eere naq inkʼaʼ chik texʼaatinaq chirix li Jesus!». Laj Pedro kixye: «Tento tqapaabʼ li Yos joʼ awabʼej ut inkʼaʼ ebʼ li winq».

Ebʼ laj kʼamolbʼe saʼ li paabʼal jwal yook xjosqʼilebʼ joʼkan naq keʼraj xkamsinkil ebʼ li Apostol. Tojaʼ naq, jun aj Pariseey aj Gamaliel xkʼabʼaʼ kixaqli ut kixye: «Kʼehomaq reetal kʼaru teebʼaanu! Maare li Yos wank rikʼinebʼ li winq aʼin. Ma relik chi yaal naq nekeeraj yalok rikʼin li Yos?». Ebʼ aʼan keʼxpaabʼ li kixye. Keʼrachʼabʼ ebʼ li winq, abʼan xbʼeenwa keʼrapeʼk chi tzʼuum ut keʼxye wiʼ chik rehebʼ naq teʼxkanabʼ puktesink. Abʼan, ebʼ li Apostol inkʼaʼ keʼabʼink. Inkʼaʼ keʼxkanabʼ puktesink saʼ rochoch li Yos ut chirekabʼlal.